الماتىدا قاردىڭ سالماعىن كوتەرە الماي قۇلاعان اعاشتار 16 كولىكتى قيراتتى - فوتو

الماتى. قازاقپارات - الماتىدا كەشە تۇننەن تاڭعا دەيىن ۇزدىكسىز جاۋعان دىمقىل قاردى كوتەرە الماعان اعاشتار بىرىنەن سوڭ ءبىرى قۇلاپ جاتىر.

بۇگىن تاڭعى 07:00 دەن باستاپ قۇتقارۋ قىزمەتىنىڭ «109» نومىرىنە 35 ءوتىنىش كەلىپ تۇسكەن.

بۇل تۋرالى قالالىق قۇتقارۋ قىزمەتىنىڭ باسپا ءسوز قىزمەتى حابارلادى.

ال ت ج د باسپا ءسوز حاتشىسى ساندۋعاش بايمۇحامبەتوۆانىڭ ايتۋىنشا، «112» توتەنشە جاعداي قىزمەتىنە 19 شاعىم تۇسكەن. ونىڭ 11 ى بوستاندىق اۋدانىنان، قالعانى اۋەزوۆ، المالى، مەدەۋ، جەتىسۋ اۋداندارىنىڭ تۇرعىندارىنان كەلگەن.

قيراعان اعاشتار، اسىرەسە، اۆتوكولىكتەرگە ۇلكەن زاقىمىن تيگىزگەن. بۇگىن تاڭنان بەرى 16 اۆتوكولىك يەسى شاعىمداندى.

المالى اۋدانىنداعى شاكارىم جانە پروكوفەۆ كوشەسىنىڭ قيىلىسىندا اعاش قۇلاپ، ءۇش بىردەي كولىكتى باسىپ قالعان. سونداي-اق، بوستاندىق اۋدانىنداعى كلوچكوۆ، 168 مەكەنجايىندا اعاش بۇتاعى ەلەكتر جەلىسىن ءۇزىپ كەتتى. وقيعا ورنىندا ارەكەت ەتكەن اپاتتى قايتا قالپىنا كەلتىرۋ بريگاداسى ەلەكتر جەلىسىن جوندەپ، جاقىن ماڭداعى ۇيلەرگە ەلەكتر ەنەرگياسى بەرىلدى.

دىمقىل قار كوشەنى جارىقتاندىرۋ سىمدارىن دا ءۇزىپ ۇلگەردى. قۇزىرلى قىزمەت وكىلدەرى قاراڭعى باتقانعا دەيىن جارىقتى قوسامىز دەپ ۋادە بەرىپ جاتىر.

قازىرگى تاڭدا قالالىق اكىمدىكتىڭ جەرگىلىكتى اتقارۋ ورگاندارىنىڭ جەدەل ارەكەت ەتۋ قىزمەتىنىڭ وكىلدەرىمەن اپاتتى قالپىنا كەلتىرۋ جۇمىستارى، جولداردى ايالدامالاردى تازالاۋ جۇمىستارى جۇرگىزىلىپ جاتىر.

ايتا كەتۋ كەرەك، الماتىدا بۇگىن تۇنگى 03:00 دەن كۇندىزگى 11 گە دەيىن تولاسسىز قار جاۋدى. اۋا رايىن بولجاۋشىلاردىڭ ايتۋىنشا، قۇبىلمالى اۋا رايى مەن كوكتايعاق، تۇمان ءالى دە 1-2 كۇن ساقتالادى.