سولتۇستىك قازاقستاندا 16 جىل مەملەكەتارالىق ىزدەۋدە بولعان قىلمىسكەردى ۇستادى
«ادام ولتىرگەن ازەربايجاننىڭ 34 جاستاعى تۇرعىنىنا 1999 -جىلى باستاپ ىزدەۋ جاريالاندى. ازەربايجاندىق ارىپتەستەردىڭ ىزدەۋ ىسىندەگى ماتەريالدارعا سايكەس، ءوز اكەسىمەن قىلمىستىق ءسوز بايلاسقان گياندجا قالاسىنىڭ تۇرعىنى باكۋ- قازاق كۇرە جولىنىڭ 285 -شاقىرىمىندا ەر ادامدى ءولتىرىپ، 14 ميلليون 800 مىڭ مانات سوماسىنداعى اقشانى ۇرلاپ اكەتتى. ارام ويلارىن جۇزەگە اسىرعان سوڭ، ولار بەلگىسىز باعىتتا ءىز-ءتۇسسىز جوعالدى»، - دەپ حابارلادى وبلىستىق ءى ءى د- نىڭ باسپا ءسوز قىزمەتىنەن.
بيىلعى جىلدىڭ ءساۋىر ايىندا سولتۇستىك قازاقستان ءى ءى د قىلمىستىق پوليتسيا باسقارماسىنىڭ قىزمەتكەرلەرى ازەربايجانداعى ارىپتەستەرىنەن اقپارات الىپ، ىزدەۋدە بولعان ەر ادامنىڭ پەتروپاۆلداعى جاتاقحانالاردىڭ بىرىندە تۇرىپ جاتقانىن انىقتادى.
ەر ادام ۇستالىپ، تەرگەۋ يزولياتورىنا قامالدى، جاقىن ۋاقىتتا ءوز ەلىنە ەكستراديتسيالانادى.
