تۇركىستاندا الەمنىڭ 16 ەلىنىڭ جاستارى تۇركىتىلدەس ستۋدەنتتەر قاۋىمداستىعىن قۇرۋدى شەشتى
الەمنىڭ 16 ەلىنەن كەلگەن 28 ۇلت وكىلى ەكى كۇن تۇركىستاندا بولدى. بۇل فەستيۆال قازاقستان حالقى اسسامبلەياسى جىلىنا ورايلاستىرىلعان. بۇدان بولەك، باسقا ەلدەردەن كەلگەن جاستار قازاق حاندىعىنىڭ 550 جىلدىعى سياقتى اتاۋلى داتا تۋرالى پىكىر الماستى.
«الەمنىڭ ءتۇرلى ەلدەرىنىڭ جاستارى وسىندا ءتىل تابىستى. ءبىزدىڭ باستامامىزدى باسقا ەلدەر دە قولدايتىنىنا ۇمىتتەنەمىز. ويتكەنى تۇركى الەمىنىڭ جاس وكىلدەرىنىڭ اراسىنداعى ءوزارا قارىم- قاتىناس پەن بايلانىستى وسىلايشا نىعايتۋعا بولادى»، - دەپ ءبولىستى ءوز پىكىرىمەن تۇركى حالىقتارى كەڭەسى حاتشىسىنىڭ ورىنباسارى ابزال ساپاربەك ۇلى.
ۇيىمداستىرۋشىلاردىڭ ايتۋىنشا، وسىنداي فەستيۆال ۇلتتىق ونەردى، ورىنداۋشىلىق شەبەرلىكتى جوعارى دەڭگەيگە كوتەرىپ، جاستاردىڭ باسقا تۇركى ەلدەرىنىڭ داستۇرلەرىمەن، سالتتارىمەن، ۇلتتىق كيىمى جانە تاعامدارىمەن تانىسۋىنا مۇمكىندىك بەرەدى.
فەستيۆالدىڭ ق. ا. ياسساۋي اتىنداعى حالىقارالىق قازاق- تۇرىك ۋنيۆەرسيتەتىندە ءوتۋى كەزدەيسوق جاعداي ەمەس. ج و و- دا 15 ەلدەن كەلگەن 30 ۇلت وكىلى قازاق، تۇرىك، ورىس جانە اعىلشىن تىلدەرىندە ءبىلىم الىپ جاتىر.
فەستيۆال قورىتىندىلارى بويىنشا تۇركىتىلدەس ستۋدەنتتەرىنىڭ حالىقارالىق قاۋىمداستىعىن قۇرۋ شەشىمى قابىلداندى.
