بيىل «سامۇرىق- قازىنا» 16 ءىرى ينۆەستيتسيالىق جوبانى ىسكە قوسادى
بۇل تۋرالى بۇگىن اتالعان قوردىڭ باس ديرەكتورى - باسقارما مۇشەسى بەرىك بيسەنعاليەۆ ءمالىم ەتتى.
«2014 - جىلى جالپى سوماسى 3 ميلليارد دوللاردى قۇرايتىن 16 ءىرى ينۆەستيتسيالىق جوبانى ىسكە قوسقالى وتىرمىز. قازىردىڭ وزىندە وسى ينۆەستيتسيالىق جوبالاردى ىسكە اسىرۋدا ۋاقىتشا 10 مىڭنان استام جۇمىس قۇرىلعان. ال جىلدىڭ اياعىندا بارلىق جوبا ىسكە قوسىلعاننان كەيىن 9 مىڭ تۇراقتى جۇمىس ورنى اشىلادى» ، - دەدى ب. بەيسەنعالييەۆ.
سونىمەن قاتار ونىڭ اتاپ وتۋىنشە، 2015-2016 - جىلدار قوردىڭ جوسپارىنا سايكەس جالپى سوماسى 23 ميلليارد دوللاردى قۇرايتىن 40 ۇلكەن ينۆەستيتسيالىق جوبا ىسكە قوسىلاتىن بولادى.
«ايتا كەتەرلىگى، 2011-2013 - جىلدارى «سامۇرىق- قازىنا» قورى 29 ۇلكەن جوبانى ىسكە قوستى. جالپى سوماسى 4,5 ميلليارد دوللاردى قۇرايدى. سول جوبالاردىڭ ارقاسىندا جاڭادان 10 مىڭنان استام تۇراقتى جۇمىس ورنى اشىلدى» ، - دەدى ول.
«سامۇرىق- قازىنا» الداعى ۋاقىتتا حيميا جانە مۇناي حيمياسى، قۇرىلىس، تاۋ- كەن جانە ماشينا جاساۋ سىندى سالالارعا باسا نازار اۋدارماق.
«قازىر قوردى تۇرلەندىرۋدىڭ اۋقىمدى باعدارلاماسى كەزەڭ- كەزەڭىمەن جۇزەگە اسىرىلىپ جاتىر. ونىڭ نەگىزگى ماقساتى - مەملەكەت اكتيۆتەرىن باسقارۋ مەن بيزنەستى جۇرگىزۋدىڭ جاڭا ساتىسىنا كوتەرىلىپ، ءبىزدىڭ كومپانيالاردىڭ جاڭا جوعارى جەتىستىكتەرگە جەتۋىنە جول اشۋ» ، - دەدى ءو. شوكەيەۆ بۇگىن قوردىڭ ەنشىلەس كاسىپورىندارى باسشىلارىمەن وتكەن كەڭەستە.
ونىڭ اتاپ وتۋىنشە، الداعى ۋاقىتتا قور حولدينگ ءۇشىن بۇعان دەيىن ءداستۇرلى بولىپ كەلگەن مۇناي مەن گاز، كولىك جانە كوممۋنيكاتسيا، ينفراقۇرىلىم مەن ەنەرگەتيكا، اتوم ءوندىرىسى سىندى سەكتورلاردان قاراجاتتى ەكونوميكانىڭ ەندى دامىپ كەلە جاتقان حيميا جانە مۇناي حيمياسى، قۇرىلىس، تاۋ- كەن جانە ماشينا جاساۋ سىندى سالالارىنا قايتا ءبولۋ قامىندا ماڭىزدى شارالاردى قولعا الماق.
«جالپى، قازىردە «سامۇرىق- قازىنا» اق قورجىنىندا جالپى قۇنى 146 ميلليارد دوللاردى قۇرايتىن 163 جوبا بار. ولارعا قور قۇيعان ءار دوللارعا قوسىمشا 3 دوللار ينۆەستيتسيا تارتىلدى» ، - دەدى باسقارما ءتوراعاسى.
اۆتور: مارلان جيەمباي
