مول جاۋعان قار تۇركىستاندىق 167 شارۋانىڭ جىلىجايىن جارامسىز كۇيگە ءتۇسىردى

None
تۇركىستان. قازاقپارات - تۇركىستان وبلىسىندا 167 شارۋاعا تيەسەلى 36 گەكتار جىلىجايدىڭ كونسترۋكسياسى قار سالماعىن كوتەرە الماي، جارامسىز كۇيگە ءتۇستى، دەپ حابارلايدى قازاقپارات ءتىلشىسى.

تۇركىستان وبلىسىندا كومىر تاپشىلىعىنان ءبىرشاما جىلىجايدا ونىمدەر ءبۇلىنىپ كەتكەن بولاتىن. ماسەلەن، سايرام اۋدانىنداعى «نۇر- اگرو» ج ش س- ءنىڭ جىلىجايىندا جىلىتۋ قازاندىعى قاتتى سۋىققا شىداس بەرمەگەن. سالدارىنان 3,6 گەكتار جىلىجايدىڭ 1,8 گەكتارىنداعى 42 مىڭ قىزاناق كوشەتى ءۇسىپ كەتكەن. جىلىتۋ جۇيەسىنىڭ 70 پايىزى، تامشىلاتۋ جۇيەسىنىڭ 70 پايىزى، تۇمانداتۋ جۇيەسىنىڭ 40 پايىزى ىستەن شىقتى.

ال «باراكات» شارۋا قوجالىعىندا جارىق جەلىسىنىڭ ءۇزىلۋى سالدارىنان 2,4 گەكتار جىلىجايدا قىزاناقتىڭ 60 مىڭ كوشەتىن ۇسىك شالعان.

وڭىردە اۋا رايىنىڭ توسىن مىنەزىنەن وسى سىندى جاعدايلارعا ۇشىراعان شارۋالار كوپ.

ءمالىم بولعانداي، تۇركىستان وبلىسىنىڭ اكىمى دارحان ساتىبالدىنىڭ تاپسىرماسىمەن جىلىجايلارعا كومەك كورسەتۋ ماسەلەسى جان- جاقتى قاراستىرىلۋدا.

بۇگىن وبلىس اكىمىنىڭ ورىنباسارى ەرمەك كەنجەحان ۇلى فەرمەرلەرمەن كەزدەستى. باسقوسۋعا جاۋاپتى باسقارما باسشىلارى مەن قارجى ۇيىمدارىنىڭ جەتەكشىلەرى قاتىستى. سونىمەن بىرگە ونلاين قوسىلعان تەمىرجول تاسىمالداۋشىلارى كوتەرىلگەن سۇراقتارعا جاۋاپ بەردى.

وبلىس اكىمدىگىنىڭ باسپا ءسوز قىزمەتىنىڭ مالىمەتىنشە، ءىرى جىلىجاي كەشەندەرى مۇنداي جاعدايعا دايىن بولعاندىقتان شىعىنعا ۇشىراماعان. ونىڭ ۇستىنە بيزنەسى ساقتاندىرىلعاندىقتان، شىعىندى زاڭ جۇزىندە وتەۋ جاعى قاراستىرىلعان.

زارداپ شەككەن - شاعىن جىلىجايلار. ولاردى قارجى ۇيىمدارى ارقىلى جەڭىلدەتىلگەن نەسيەمەن قامتۋ جۇمىسى اتقارىلۋدا. الايدا جىلىجايلاردىڭ % 90 استامىنىڭ قۇجاتتارى جوق نەمەسە تۇگەل ەمەس بولىپ شىققان. ياعني، زاڭ اياسىندا قارجىلاي قولداۋ جاعى قيىنعا تۇسەدى.

سونداي- اق قاتتى جاۋعان قاردان قۇلاعان جىلىجايلاردىڭ باسىم بولىگىندە ەگىن ەگۋ جۇمىستارى باستالماعان. جالپى، شاعىن جىلىجايلار جەڭىل كونسترۋكسيادان، قولدان جاسالعان. بۇگىندە 167 تاۋار ءوندىرۋشىنىڭ 36 گەكتار جىلىجايى قار سالماعىن كوتەرە الماي، جارامسىز كۇيگە تۇسكەن.

«وبلىس اكىمدىگى تاراپىنان جىلىجاي يەلەرىنە قولداۋ كورسەتۋ جولدارى جان- جاقتى زەردەلەنىپ جاتىر. بارلىق تاراپتىڭ ۇسىنىسى سارالانعاننان كەيىن زاڭ اياسىندا كومەك كورسەتىلەدى»، - دەلىنگەن وبلىس اكىمدىگىنىڭ باسپا ءسوز قىزمەتى تاراتقان اقپاراتتا.

ايتا كەتەيىك، كومىر تاپشىلىعىنان تۇركىستان وبلىسىندا جىلىجايداعى ونىمدەر ءۇسىپ جاتقانىن بۇدان بۇرىن جازعان بولاتىنبىز. ول كەزدە ءوڭىر اكىمدىگى تاۋار وندىرۋشىلەردىڭ مۇلكىنە كەلتىرىلگەن نۇقسان جونىندە اكت ۇسىنىلعان جاعدايدا، قارجى ۇيىمدارى الدىنداعى بەرەشەكتى (نەسيە) وتەۋ مەرزىمىن 1 جىلعا شەگەرۋ جونىندە ۇسىنىس جولداناتىنى تۋرالى ايتقان ەدى.

فوتو: otyrar.kz

اۆتور

قايرات زاينيشيەۆ

سوڭعى جاڭالىقتار