قازاقستاندا كولىكتەردىڭ 167 مودەلى شىعارىلۋدا
«الەمدىك ەكونوميكالىق قيىن جاعدايلاردىڭ قالىپتاسۋىنا بايلانىستى پرەزيدەنت قاسىم-جومارت كەمەل ۇلى داعدارىسقا قارسى شارالار پاكەتىن قابىلداۋدى تاپسىردى. ول شارالار تۋرالى ۇكىمەت تە، ۇكىمەت باسشىسى اسقار ۇزاقباي ۇلى دا بىرنەشە مارتە ايتقان بولاتىن»، - دەدى داۋرەن ابايەۆ «اشىق ديالوگ» باعدارلاماسىندا.
داۋرەن ابايەۆ وسى شارالاردىڭ نەگىزگىلەرىنە توقتالىپ ءوتتى.
«باستى باسىمدىق - جۇمىسپەن قامتۋ، جۇمىس ورىندارىن ساقتاپ قالۋ. ماسەلەن ءبىزدىڭ ەلدەگى تاۋ-كەن كەشەندەرى مەن جالپى وڭدەۋ ونەركاسىبىندە 700 مىڭ ادام جۇمىس ىستەيدى. ولاردىڭ بىردە-ءبىرى جۇمىسىن جوعالتپايدى. قۇرىلىس سالاسىندا كەرىسىنشە جۇمىس اۋقىمىن 20 ميلليون شارشى مەترگە كوبەيتۋ كوزدەلگەن. وسىنىڭ ارقاسىندا جۇمىس ورىندارى ساقتالىپ قانا قويماي، قوسىمشا اشىلاتىن دا بولادى. وتە ماڭىزدى ماسەلە: جوسپارلانعان جولداردىڭ ءبارى دە بيىل قولدانىسقا بەرىلەدى»، - دەدى ول.
داۋرەن ابايەۆ مۇناي باعاسىنىڭ قۇلدىراپ كەتكەنىن، الايدا قازىرگى جاعدايدا مەملەكەت ءۇشىن ونىڭ باعاسى ەمەس، جۇمىس ورىندارىن ساقتاپ قالۋ ماڭىزدىراق ەكەنىن جەتكىزدى.
«سەبەبى مۇناي-گاز سالاسىندا 1500 گە تارتا كومپانيا جۇمىس ىستەيدى. ول 100 مىڭداعان جۇمىس ورىنى دەگەن ءسوز. يندۋستريالاندىرۋ باعدارلاماسى قانشا مارتە سىنعا ۇشىراعانى ەسىڭىزدە بولار. يندۋستريالىق دامۋ باعدارلاماسى باستالعالى بەرى 1300 گە تارتا جوبا اشىلدى. ولاردا 250 مىڭ ادام جۇمىس ىستەۋدە. وسىنىڭ ارقاسىندا بيىل ماشينا قۇراۋ دەڭگەيى 20 پايىزعا، جەڭىل ونەركاسىپ 8 پايىزعا ارتتى. مۇنداي كورسەتكىشتەرىمىز جەتەرلىك. وڭدەۋ ونەركاسىبىندەگى جيىنتىق ءوندىرىستىڭ كولەمى يندۋسترياليزاتسيا جىلدارىندا 71 تريلليون تەڭگەگە جەتتى. قازاقستاندا تەپلوۆوز، اۆتوبۋس، ۆاگون، جۇك تاسىمالداۋ كەمەلەرى، موبيلدى-بۇرعىلاۋ كەشەندەرى، موتورلى مايلار، رادياتورلار شىعارىلا باستادى»، - دەدى ول.
ءمينيستردىڭ ايتۋىنشا قازاقستاندا قازىر كولىكتەردىڭ 167 مودەلى شىعارىلۋدا.
«بۇگىنگى تاڭدا قازاقستاندا ساتىلعان ءاربىر ەكىنشى اۆتوكولىك وتاندىق وندىرىسكە تيەسىلى. بۇرىن قازاقستاننىڭ اۆتوكولىك سالاسىنداعى تالاپ-تىلەگىنە بىرەۋلەر كۇلەتىن. وندايلار بۇل جاي عانا قۇرالعان كولىكتەر دەيتىن. ءبىراق قوستانايدا قازىر ۇساق ۋزەلدىك قۇراۋ جۇمىستارى دا باستالىپ كەتتى. بۇل باعىتتاعى جۇمىس جالعاسىن تابادى»، - دەدى مينيستر.
