الماتى قالاسىندا اۋدانى 167 گەكتار 173 ۋچاسكە تاركىلەندى - باس پروكۋراتۋرا
«بۇگىنگى تاڭدا الماتى قالاسىنىڭ جەر رەسۋرستارىن باسقارۋ دەپارتامەنتى پروكۋراتۋرا ورگاندارىنىڭ جۇمىسىنىڭ ناتيجەسىندە اۋدانى 167 گەكتار (كاداسترلىق قۇنى 10 ميلليارد تەڭگە) 173 ۋچاسكەنى تاركىلەدى. دەن قويۋ ءىس- شارالارى بويىنشا ۋاكىلەتتى ورگانداردىڭ الدىندا اۋدانى 6,05 گەكتار جەردى قايتارۋ تۋرالى سوتقا 40 تالاپ بەرۋگە باستاماشىلىق جاسالدى. 750 ۋچاسكە (1,1 مىڭ گەكتار) بويىنشا تەكسەرۋ ءىس- شارالارى جالعاسۋدا»، - دەپ اتاپ وتەدى باس پروكۋرور جاۋابىندا.
ونىڭ ايتۋىنشا، پروكۋراتۋرا ورگاندارىنىڭ استانانىڭ، رەسپۋبليكالىق ماڭىزى بار قالالاردىڭ جانە وبلىس ورتالىقتارىنىڭ نۇكتەلىك قۇرىلىسىنا قاتىستى تەكسەرۋلەر قورىتىندىسى بويىنشا ۇكىمەتكە ءبىرقاتار ۇسىنىس بەرگەن.
«باس پروكۋراتۋرانىڭ تەكسەرۋ قورىتىندىسى بويىنشا ۇكىمەتكە قالا قۇرىلىسىن باقىلاۋ جۇيەسىن كۇشەيتۋ، اتاپ ايتقاندا، قۇرىلىس پروتسەستەرىنىڭ اشىقتىعىن بەلگىلەۋ ماقساتىندا جەر ۋچاسكەسىن العان ساتتەن باستاپ وبەكتىنى پايدالانۋعا بەرگەنگە دەيىنگى بارلىق ءراسىمدى باقىلاۋ جانە كەلىسۋ بويىنشا «ءبىرىڭعاي تەرەزە» ازىرلەۋ؛ سانيتارلىق- ەپيدەميولوگيالىق باقىلاۋ جانە توتەنشە جاعدايلار ورگاندارىنا قالا قۇرىلىسى قۇجاتتارىن كەلىسۋ قۇزىرەتىن بەرۋ؛ قالا قۇرىلىسى كودەكسىنىڭ جوباسىندا تۇرعىن ۇيلەردى سالۋ جانە پايدالانۋ، ونىڭ ىشىندە كوگالداندىرۋ ءۇشىن جەتكىلىكتى جەر ۋچاسكەسى بولماعان كەزدە ولارعا رۇقسات بەرۋ قۇجاتتاماسىن بەرۋگە تىكەلەي تىيىم سالۋدى كوزدەۋ جونىندە ۇسىنىستارىمەن زاڭدىلىقتى بۇزۋشىلىقتاردى جويۋ تۋرالى ۇسىنۋ ەنگىزىلدى. جۇمىس قورىتىندىسى بويىنشا ۇكىمەت بۇزۋشىلىقتاردى جويۋ بويىنشا جول كارتاسىن ازىرلەدى. باس پروكۋراتۋرانىڭ ۇسىنىستارى قولداۋ تاپتى»، - دەدى بەرىك اسىلوۆ.
