قوبىزشى مولىقباي بايساق ۇلىنىڭ تۋعانىنا 160 جىل تولدى - فوتو
مەرەيتويعا وراي قوبىزشىنىڭ تۋعان جەرى الماتى وبلىسىنداعى اقسۋ اۋدانىندا وبلىستىق قوبىزشىلار بايقاۋى ءوتتى، دەپ حابارلايدى قازاقپارات ءتىلشىسى.
«قوبىزشى مولىقباي شال ماتايداعى» اتتى ساحنالىق قويىلىم كوپشىلىككە ۇسىنىلىپ، كونسەرتتىك باعدارلاما ۇيىمداستىرىلدى.
ال، ۇمىتكەرلەر قىل قوبىز جانە پريما قوبىز نوميناتسيالارى بويىنشا باق سىناستى. مولىقباي بايساق ۇلى اقسۋ اۋدانى قوساعاش اۋىلىندا 1857-جىلى دۇنيەگە كەلگەن.
ول شەبەر قوبىزشى، سازگەر، ەمشى، كەڭەستىك قۋعىن-سۇرگىننىڭ جازىقسىز قۇربانى رەتىندە ەستە قالعان. مولىقباي - جىر ءدۇلدۇلى ءىلياس جانسۇگىروۆتىڭ كىندىك اكەسى. ءارى اقىننىڭ «قۇلاگەر» پوەماسىنىڭ باس كەيىپكەرى بولعان.
بايقاۋ ءىلياس جانسۇگىروۆ اۋىلىنداعى مولىقباي بايساق ۇلى اتىنداعى مادەنيەت ۇيىندە ءوتتى. مۇندا العاش رەت وبلىستىق قوبىزشىلار بايقاۋى ۇيىمداستىرىلىپ وتىر.
شاراعا 17 اۋداننىڭ قوبىزشىلارى كەلىپ قاتىستى. ۇيىمداستىرۋشىلاردىڭ ايتۋىنشا، وسىنداي سايىستار تالانتتاردى شابىتتاندىرىپ، شەبەرلىكتەرىن ۇشتاي تۇسەدى.
ال جارىستىڭ باس جۇلدەسىن اقسۋ اۋدانىنىڭ تۇرعىنى نازەركە نۇرمۇحانبەتوۆا قانجىعالادى. جەڭىمپاز 2-سىنىپتان باستاپ قوبىز تارتادى ەكەن. بۇگىندە ول ونەر مەكتەبىندە ساباق بەرەدى.
شارادا «قوبىزشى مولىقباي بايساق ۇلى» اتتى كونفەرەنسيا ۇيىمداستىرىلدى. باس قوسۋدا تاريحي تۇلعانىڭ ارتىندا قالدىرعان مۇرالارى تانىستىرىلدى. سوڭى قوبىزشىلار بايقاۋىنىڭ گالا كونسەرتىنە جالعاستى.
اۆتور: سامال قابىشەۆا
