تالدىقورعاننىڭ 160 مىڭىنشى تۇرعىنىنا سەرتيفيكات تاپسىرىلدى
25 - مامىردا دۇنيەگە كەلگەن التىناي داستان قىزى ماقۇلبەكوۆا تالدىقورعان قالاسىنىڭ 160 مىڭىنشى تۇرعىنى اتاندى. التىنايدىڭ اتا-اناسى داستان ماقۇلبەكوۆ پەن نازەركە مىرزاحانوۆا 2013 - جىلدىڭ كۇزىندە شاڭىراق كوتەرگەن.
«بۇل قالامىز ءۇشىن ماڭىزدى وقيعا، - دەيدى قالا اكىمى.
- تالدىقورعان تاريحىندا العاش رەت قالا تۇرعىنى 160 مىڭدىق كورسەتكىشتەن استى. جاس اتا- انالاردى، ءسابي سۇيگەنىمەن شىن جۇرەكتەن قۇتتىقتايمىن. التىناي دەنى ساۋ، اقىلدى قىز بولىپ ءوسىپ، بيىك بەلەستەردى باعىندىرسىن».
قالا باسشىسى باقىتتى اتا-اناعا ولاردىڭ قىزى 160 مىڭىنشى تۇرعىن ەكەنىن راستايتىن سەرتيفيكات پەن بالاعا ارنالعان اربا جانە كونۆەرت ۇسىندى.
ءسابيدىڭ اتا-اناسىنىڭ ەكەۋى دە 1990 - جىلدىڭ تۋماسى، قازم ۋ تۇلەكتەرى. وتاعاسى داستان - جەكە كاسىپكەر، نازەركە دەكرەت دەمالىسىنا دەيىن جەكە كومپانيالاردىڭ بىرىندە كەڭسە مەنەدجەرى بولىپ جۇمىس ىستەگەن.
اتاپ ءوتۋ كەرەك، تالدىقورعاندا «قولجەتىمدى باسپانا - 2020» باعدارلاماسى ءساتتى جۇزەگە اسىپ كەلەدى. جوبا اياسىندا وبلىس ورتالىعىنداعى جاس وتباسىلار باسپاناعا قول جەتكىزە الادى. وسىلايشا، جاڭا جىل قارساڭىندا 120 جاس جانۇيا پاتەر كىلتىنە يە بولدى. قالا باسشىسىنىڭ سوزىنە قاراعاندا، بۇل ءداستۇر اعىمداعى جىلى دا جالعاسىن تابادى.
