الماتى اۋلالارىندا قوسىمشا 1600 كامەرا ورناتىلادى
قالالىق ءى ءى د باسشىسى سەرىك كۇدەبايەۆتىڭ ايتۋىنشا، بيىل ادامدار كوپ شوعىرلانعان جەرلەر - ساياباق، الاڭ، ءۇي اۋلالارى، مادەنيەت، ءبىلىم، سپورت نىساندارى ماڭايىن بەينە باقىلاۋعا الۋ كۇشەيە تۇسپەك.
قازىرگى تاڭدا 568 اۋلادا 5653 بەينەباقىلاۋ كامەراسى ورناتىلعان. جىل سوڭىنا دەيىن وسىنداي قاۋىپسىزدىك قۇرالىمەن 350 اۋلا قامتىلىپ، قوسىمشا 1600 بەينەكامەرا ورناتىلادى.
«پوليتسيا قىزمەتكەرلەرىنىڭ جۇمىسىن تەكسەرۋ مەن قالا كوشەلەرىندەگى قاۋىپسىزدىك شارالارىن ارتتىرۋ ماقساتىندا الماتىدا اۆتوماتتاندىرىلعان باقىلاۋ جۇيەسى ورناتىلعان. بۇل شارا ءوزىنىڭ تيىمدىلىگىن كورسەتتى. قازىرگى تاڭدا جول قوزعالىسى ەرەجەسىن بۇزۋ 1,6 ەسە ازايدى»، - دەدى كەڭەستە قالا اكىمى احمەتجان ەسىموۆ.
سونداي-اق، بۇگىنگى جيىن بارىسىندا قالالىق ءى ءى د باسشىلىعى العاشقى جارتىجىلدىقتا اتقارىلعان جۇمىس قورىتىندىسى تۋرالى اكىمگە ەسەپ بەردى.
اۆتور: گۇلميرا ءعوسمانالي
