16 مىڭ تۋريست بارعان سارايشىقتىڭ قانداي قۇپياسى بار
استانا. KAZINFORM - اتىراۋ وبلىسىندا تاريحي-مادەني تۋريزم دامىپ كەلەدى. ءوڭىردىڭ باستى تۋريستىك نىساندارىنىڭ ءبىرى - ورتاعاسىرلىق سارايشىق قالاسىنا 2026-جىلدىڭ توعىز ايىندا 16252 تۋريست بارعان.
تۋريزم يندۋسترياسى كوميتەتىنىڭ ءمالىم ەتكەنىندەي، جالپى، بيىلعى العاشقى جارتىجىلدىقتا اتىراۋ وبلىسىنا 83 مىڭنان استام تۋريست بارعان.
بۇل وتكەن جىلدىڭ سايكەس كەزەڭىمەن سالىستىرعاندا 19 پايىزعا كوپ.
ال قاڭتار-تامىز ايلارىندا تۋريزم سالاسىنا تارتىلعان ينۆەستيتسيا كولەمى 37,9 ميلليارد تەڭگەنى قۇرادى.
اتىراۋ قالاسىنان 50 شاقىرىم جەردە، جايىق وزەنىنىڭ جاعاسىندا ورنالاسقان سارايشىق XIII- XVI عاسىرلاردا ۇلى جىبەك جولىنىڭ بويىنداعى ءىرى ساۋدا، عىلىم جانە قولونەر ورتالىقتارىنىڭ ءبىرى بولعان.
التىن وردا داۋىرىندە ساياسي جانە رۋحاني ماڭىزعا يە بولىپ، كەيىن نوعاي ورداسىنىڭ استاناسىنا اينالعان. قالا تاريحى قازاق حاندىعىنىڭ بيلەۋشىسى قاسىم حاننىڭ ەسىمىمەن دە تىعىز بايلانىستى.
بۇگىندە سارايشىق رەسپۋبليكالىق ماڭىزى بار تاريحي-مادەني ەسكەرتكىشتەر تىزىمىنە ەنگەن. مۋزەي-قورىق قۇرامىندا 2023-جىلى اشىلعان ساپار ورتالىعى، ەتنوگرافيالىق مۋزەي، «حاندار» كەسەنەسى جانە ورتاعاسىرلىق قالاشىق ورنى بار.
كەلۋشىلەر ارحەولوگيالىق قازبا جۇمىستارى كەزىندە تابىلعان كەراميكالىق ىدىستاردى، تۇرمىستىق بۇيىمداردى، كونە تيىنداردى جانە باسقا دا تاريحي جادىگەرلەردى تاماشالاي الادى.
اتىراۋ وبلىسىندا سارايشىقتان بولەك، قيعاش وزەنىندەگى لوتوس القابى، يندەر تۇزدى كولى، نارىن قۇمى، اقكەرەگەشىڭ بورلى قىراتى جانە «اقجايىق» مەملەكەتتىك تابيعي رەزەرۆاتى تۋريستەردىڭ قىزىعۋشىلىعىن تۋدىرادى.
قازىرگى ۋاقىتتا سارايشىقتى تاريحي-تۋريستىك ورتالىق رەتىندە دامىتۋعا ارنالعان بەس جىلدىق جوسپار بەكىتىلگەن. ونىڭ اياسىندا تاريحي مۇرانى ساقتاۋ جانە تۋريستىك ينفراقۇرىلىمدى دامىتۋ كوزدەلگەن.
وسىدان بۇرىن اتىراۋلىقتار مەن تۋريستەرگە لوتوستى جۇلماۋ جونىندە ەسكەرتۋ جاسالدى.
