16 جاسقا دەيىنگى بالالارعا الەۋمەتتىك جەلىدە تىركەلۋگە تىيىم سالىنباق - قۇرىلتاي زاڭ جوبالارىن تالقىلاپ جاتىر

استانا. KAZINFORM - ەلىمىزدە ونلاين-پلاتفورمالاردىڭ جاۋاپكەرشىلىگىن كۇشەيتۋ، بالالاردى زياندى كونتەنتتەن قورعاۋ جانە تسيفرلىق كەڭىستىكتەگى ازاماتتاردىڭ قۇقىقتارىن ساقتاۋ كوزدەلىپ وتىر.

в
Фото: Т. Таныбаев

وسى ماقساتتا 16 جاسقا تولماعان بالالاردىڭ ونلاين-پلاتفورمالاردا تىركەلۋىنە تىيىم سالۋ، 5 مىڭنان استام جازىلۋشىسى بار اككاۋنتتاردى سايكەستەندىرۋ جانە پلاتفورمالارعا قازاقستاندا زاڭدى وكىلدىك اشۋ مىندەتىن جۇكتەۋ ۇسىنىلادى.

بۇل تۋرالى قۇرىلتاي وتىرىسىندا مادەنيەت جانە اقپارات ءمينيسترى ارمان قىرىقبايەۆ ايتتى.

ءمينيستردىڭ ايتۋىنشا، مەدياكەڭىستىكتە جاڭا سىن-قاتەرلەردىڭ پايدا بولۋى زاڭنامالىق بازانى ۋاقىتىلى جەتىلدىرۋدى تالاپ ەتەدى. اسىرەسە، ونلاين ورتادا دەسترۋكتيۆتى كونتەنتتىڭ تارالۋى مەن زاڭعا قايشى ارەكەتتەردىڭ كوبەيۋى وزەكتى ماسەلەگە اينالعان.

وسىعان بايلانىستى ونلاين-پلاتفورمالاردىڭ جاۋاپكەرشىلىگىن ارتتىرۋعا جانە زاڭعا قايشى كونتەنتتىڭ تارالۋىن ازايتۋعا باعىتتالعان ەكى زاڭ جوباسى ازىرلەندى. ولار - «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ونلاين- پلاتفورمالار جانە ماسس-مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ونلاين-پلاتفورمالار جانە ماسس-مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى.

ارمان قىرىقبايەۆ زاڭ جوبالارىندا كوزدەلگەن نەگىزگى جاڭاشىلدىقتاردى ءتورت باعىتقا ءبولىپ قاراستىرۋعا بولاتىنىن اتاپ ءوتتى.

- ءبىرىنشى. بۇگىنگى تاڭدا وزەكتى ماسەلەلەردىڭ ءبىرى - ونلاين-پلاتفورمالاردىڭ قازاقستان رەسپۋبليكاسى زاڭناماسىنىڭ تالاپتارىن ساقتاۋىن قامتاماسىز ەتۋ. 2026 -جىلدىڭ 10 ايىنداعى مونيتورينگ ناتيجەلەرى بويىنشا پلاتفورمالاردا زاڭعا قايشى 128 مىڭنان استام ماتەريال انىقتالدى. الايدا ولاردىڭ تەك قانا 70 پايىزى ءوشىرىلدى. بۇل پلاتفورمالاردىڭ زاڭناما تالاپتارىن ورىنداۋ جاۋاپكەرشىلىگىن كۇشەيتۋ قاجەتتىگىن كورسەتەدى،- دەدى ول.

ونىڭ ايتۋىنشا، ەڭ الدىمەن پلاتفورمالاردىڭ قازاقستان رەسپۋبليكاسىنىڭ اۋماعىندا زاڭدى تۇلعا نىسانىنداعى وكىلدىكتەرىن اشۋ جونىندەگى تالاپتى زاڭنامالىق تۇرعىدان بەكىتۋ ۇسىنىلادى. سونىمەن قاتار پلاتفورما يەسى مەن ونىڭ وكىلدىگى زاڭعا قايشى كونتەنتتى نەمەسە بالاعا قاتىستى كيبەربۋللينگ دەپ تانىلعان اقپاراتتى جويۋ جونىندەگى ۋاكىلەتتى ورگاننىڭ نۇسقامالارىن ورىنداماعانى ءۇشىن اكىمشىلىك جاۋاپقا تارتىلادى. بۇدان بولەك، زاڭ جوبالارىندا 5 مىڭنان استام جازىلۋشىسى بار پايدالانۋشىلار مەن جاريا قاۋىمداستىقتاردى سايكەستەندىرۋ تەتىگى دە كوزدەلگەن.

16 جاسقا تولماعان بالالاردىڭ تىركەلۋىنە شەكتەۋ قويىلادى

ءمينيستردىڭ اتاپ وتۋىنشە، ەكىنشى باعىت اياسىندا سيفرلىق ورتادا بالالاردىڭ قاۋىپسىزدىگىن قامتاماسىز ەتۋگە ەرەكشە نازار اۋدارىلادى.

- بۇگىندە بالالاردىڭ پلاتفورمالارداعى اقپاراتقا، ونىڭ ىشىندە زياندى جانە دەسترۋكتيۆتى كونتەنتكە قول جەتكىزۋى ءىس جۇزىندە شەكتەلمەگەن. وسىعان بايلانىستى 16 جاسقا تولماعان بالالاردىڭ پلاتفورمالاردا تىركەلۋىنە تىيىم سالۋ ۇسىنىلادى،-دەدى مينيستر.

ارمان قىرىقبايەۆتىڭ سوزىنە قاراعاندا، پلاتفورما يەلەرى مەن ولاردىڭ وكىلدىكتەرى پايدالانۋشىلاردىڭ جاسىن تەكسەرۋ شارالارىن قابىلداۋعا مىندەتتى بولادى. بۇل رەتتە تىيىم تۇلعاارالىق قارىم-قاتىناس جاساۋعا، اتا-انالارمەن جانە مۇعالىمدەرمەن بايلانىس ورناتۋعا ارنالعان مەسسەندجەرلەرگە قولدانىلمايدى.

ونلاين كينوتەاترلاردىڭ قىزمەتى زاڭمەن رەتتەلەدى

ءۇشىنشى باعىت اۋديوۆيزۋالدى كونتەنتتى تاراتۋ سالاسىن قامتيدى. بۇگىندە تەليەۆيزيالىق جانە وزگە دە اۋديوۆيزۋالدى كونتەنت ءداستۇرلى تەلەراديو حابارلارىن تاراتۋ ارقىلى عانا ەمەس، ونلاين كينوتەاترلار سياقتى ءتۇرلى پلاتفورمالار ارقىلى دا تارالادى. الايدا قولدانىستاعى زاڭناما نەگىزىنەن تەلەراديو ارنالاردى تاراتۋدىڭ ءداستۇرلى تاسىلدەرىن رەتتەيدى.

- وسىعان بايلانىستى اۋديوۆيزۋالدى پلاتفورمالار مەن ونلاين كينوتەاترلاردىڭ قىزمەتىن زاڭنامالىق تۇرعىدان رەتتەۋ ۇسىنىلادى. اتاپ ايتقاندا، اۋديوۆيزۋالدى پلاتفورما ارقىلى تەلەراديو ارنالاردى تاراتۋ ليتسەنزيا نەگىزىندە جۇزەگە اسىرىلىپ، ال ونلاين كينوتەاترلار ەلىمىزدىڭ اۋماعىندا زاڭدى وكىلىن ايقىنداۋعا مىندەتتى بولادى، - دەدى ول.

مەملەكەتتىك ورگانداردىڭ رەسمي جاۋابىنا ارنايى بەلگى قويىلادى

ءتورتىنشى باعىت اقپارات كەڭىستىگىندەگى رەسمي ۇستانىم مەن جۋرناليستىك ماتەريالدىڭ مازمۇنىن اجىراتۋعا قاتىستى. اقپارات كەڭىنەن تارالاتىن قازىرگى جاعدايدا مەملەكەتتىك ورگاننىڭ رەسمي جاۋابى مەن جۋرناليستىك ماتەريالدىڭ مازمۇنىن ناقتى اجىراتۋدىڭ ماڭىزى ارتىپ وتىر. وسى ماقساتتا مەملەكەتتىك ورگانداردىڭ جاۋاپتارىن ب ا ق-تا جاريالاۋ كەزىندە ارنايى بەلگى قويۋ ۇسىنىلادى.

سونىمەن قاتار زاڭ جوباسىندا ونلاين ورتادا ازاماتتاردىڭ ار- نامىسى، قادىر-قاسيەتى مەن ىسكەرلىك بەدەلىن قورعاۋ ماسەلەسىنە دە نازار اۋدارىلعان. بۇگىندە مۇنداي قۇقىقتارعا نۇقسان كەلتىرەتىن مالىمەتتەر مەن جالا جابۋ الەۋمەتتىك جەلىلەر ارقىلى كەڭ اۋديتورياعا تارالۋى مۇمكىن.

- وسىعان بايلانىستى زاڭ جوباسىندا تەرىسكە شىعارۋدى ار-نامىس پەن قادىر- قاسيەتكە نۇقسان كەلتىرەتىن مالىمەتتەر تاراتىلعان سول اقپارات كوزىندە، ونىڭ ىشىندە الەۋمەتتىك جەلىلەردە دە ورنالاستىرۋ كوزدەلەدى. سونداي-اق ماسس-مەديا مەن پلاتفورمالاردا بالاعات سوزدەر قولدانعانى جانە پلاتفورمالاردا جالا جاپقانى ءۇشىن اكىمشىلىك جاۋاپتىلىق ەنگىزۋ ۇسىنىلادى. بۇل ازاماتتاردىڭ قۇقىقتارىن قورعاۋ تەتىكتەرىن ءداستۇرلى بۇقارالىق اقپارات قۇرالدارىندا عانا ەمەس، سيفرلىق ورتادا قولدانۋدى قامتاماسىز ەتۋگە مۇمكىندىك بەرەدى،-دەدى ارمان قىرىقبايەۆ.

بۇدان بولەك، ادامنىڭ بەينەسىن ونىڭ كەلىسىمىنسىز پايدالانۋعا قاتىستى جاعدايلار ناقتىلانادى. اشىق دەرەككوزدەردەن الىنعان ادامداردىڭ فوتو، ۆيدەو بەينەلەرىن ولاردىڭ كەلىسىمىنسىز پايدالانۋعا تەك ادامنىڭ ءوزى ولاردى ودان ءارى پايدالانۋعا تىيىم سالماعان جاعدايدا عانا جول بەرىلەتىن بولادى. سونىمەن قاتار ادامنىڭ جەكە جانە وتباسىلىق ومىرىنە قاتىستى مالىمەتتەر مەن بەينەلەر ونىڭ قىزمەتتىك ىسىنە جاتپايتىنى تىكەلەي بەكىتىلەدى.

- ءبىلىم بەرۋ كونتەنتى مەن وككۋلتتىك قىزمەتتەر تۋرالى اقپاراتتىڭ اشىقتىعىن قامتاماسىز ەتۋگە ەرەكشە نازار اۋدارىلادى. ۇسىنىلىپ وتىرعان تالاپتاردىڭ باستى ماقساتى - ازاماتتارعا ءبىلىم بەرۋ كۋرستارىن تاراتاتىن تۇلعالاردىڭ ءتيىستى ءبىلىمى بار- جوعى، سونداي- اق ۇسىنىلاتىن وككۋلتتىك قىزمەتتەردىڭ سيپاتى تۋرالى اقپارات الۋ مۇمكىندىگىن بەرۋ. وسىلايشا، بۇل باعىت تاراتىلاتىن اقپاراتتىڭ اشىقتىعىن ارتتىرۋعا جانە ازاماتتاردىڭ قۇقىقتارىن قورعاۋ كەپىلدىكتەرىن كۇشەيتۋگە باعىتتالعان،- دەدى مينيستر.

ايتا كەتەيىك، بۇگىنگى وتىرىستا 16 جاسقا تولماعان بالالاردىڭ الەۋمەتتىك جەلىگە تىركەلۋىنە تىيىم سالۋ، 2027-2029-جىلدارعا ارنالعان رەسپۋبليكالىق بيۋدجەت جانە قازاقستان مەن سينگاپۋر اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى كەلىسىمدى راتيفيكاتسيالاۋ ماسەلەلەرى قارالادى.