ۇلتتىق بانك بازالىق ستاۆكانى نەلىكتەن 16,75 پايىز دەڭگەيىندە ساقتاپ قالعانىن ءتۇسىندىردى

استانا. قازاقپارات - ۇلتتىق بانك ءتوراعاسى عالىمجان ءپىرماتوۆ بازالىق مولشەرلەمەنى 16,75 پايىز دەڭگەيىندە ساقتاۋ سەبەبىن ءتۇسىندىردى، دەپ حابارلايدى قازاقپارات ءتىلشىسى.

«ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى %16,75 دەڭگەيىندە ساقتاۋ تۋرالى شەشىم قابىلدادى. 2022-جىلدىڭ باسىنان بەرى جىلدىق ينفلياتسيا العاش رەت تومەندەپ، ناۋرىزدا 18,1 پايىزدى كورسەتتى. ينفلياتسيانىڭ تومەندەۋى - كۇتىلگەن جاعداي جانە ۇلتتىق بانكتىڭ بولجامدارىندا ەسكەرىلگەن بولاتىن. ايلىق جانە بازالىق ينفلياتسيا دا تومەندەۋىن كورسەتتى، ءبىراق ءالى دە جوعارى قالپىندا قالىپ وتىر. اقپاندا كۇرت تومەندەپ، ناۋرىزدا قايتادان وسكەن ينفلياتسيالىق كۇتۋلەردىڭ تۇراقسىزدىق تاۋەكەلى ءىشىنارا ىسكە استى. وسىلايشا، ەلدەگى ينفلياتسيالىق پروتسەستەردىڭ كەيبىر وڭ وزگەرىستەرى بايقالىپ وتىر، ءبىراق ول وزگەرىستىڭ بارلىعى تۇراقتى تۇردە تومەندەۋ سيپاتىن بىلدىرەدى دەپ ايتۋعا ءالى ەرتە. وڭ ديناميكاعا قاراماستان، ينفلياتسيانىڭ ايلىق كورسەتكىشى ازىرگە نورمادان ەداۋىر اسىپ تۇر»، - دەدى ول.

ونىڭ اتاپ وتۋىنشە، بولاشاقتا ينفلياتسيانىڭ تومەندەۋىن تەجەيتىن جانە ونىڭ جەدەلدەۋ تاۋەكەلىن ارتتىراتىن ىشكى جانە سىرتقى فاكتورلار ساقتالىپ، ءىشىنارا ىسكە اسىپ جاتىر.

جانار-جاعارماي نارىعىندا جانە تۇرعىن-ءۇي كوممۋنالدىق شارۋاشىلىق قىزمەتتەرىندە باعا بەلگىلەۋدىڭ مەرزىمى جەتكەن رەفورمالارى ينفلياتسيالىق پروتسەستەرگە تىكەلەي جانە جاناما اسەر ەتەدى.

الايدا، ورتا جانە ۇزاق مەرزىمدى كەزەڭدە نارىقتىق باعالار ەكونوميكا سەكتورلارىنىڭ دامۋىنا جانە ينفلياتسيالىق پروتسەستەردىڭ جاقسىراق بولجانۋىنا وڭ اسەر ەتەدى.

«مەملەكەتتىك شىعىستاردىڭ ۇلعايۋى مەن فيسكالدىق قاعيدالاردى ۋاقىتشا ۇستانباۋ دا پروينفلياتسيالىق فاكتورلاردى كۇشەيتەدى. ينفلياتسيانىڭ تۇراقتى تومەندەۋ تراەكتورياسىنا قول جەتكىزۋ - ءبىزدىڭ نەگىزگى مىندەتىمىز بولىپ قالىپ وتىر. وسىعان بايلانىستى ۇلتتىق بانك بۇعان دەيىن ايتىلعان ۇستانىمىنا سايكەس، ينفلياتسيالىق پروتسەستەردىڭ باسەڭدەۋىن قولداۋ ماقساتىندا بازالىق مولشەرلەمەنى قازىرگى دەڭگەيدە ساقتاۋ تۋرالى شەشىم قابىلدادى. ءبىزدىڭ الداعى ءىس-ارەكەتتەرىمىز مامىردا جاڭارتىلعان بولجام ناتيجەسىندە، ونىڭ ىشىندە جاڭا دەرەكتەر مەن جانار-جاعارماي نارىعىنداعى جانە تۇرعىن-ءۇي كوممۋنالدىق شارۋاشىلىعىنداعى رەفورمانىڭ پارامەترلەرىنە بايلانىستى بولادى»، - دەدى ۇ ب ءتوراعاسى.