اتىراۋلىق زاۋىت 16 جىلدان بەرى 60 ميلليونعا جۋىق شاباقتى جايىق- كاسپي باسسەينىنە جىبەرگەن
اتىراۋداعى ەكى زاۋىت جىل سايىن 7 ميلليونعا جۋىق بەكىرە بالىعىنىڭ شاباقتارىن تابيعي ورتاعا جىبەرەدى. باستى ماقسات - زاڭسىز بالىق اۋلاۋشىلاردىڭ جولىنا توسقاۋىل قويۋ، جۇرتشىلىقتىڭ ساناسىنا وزگەرىس ەنگىزۋ. 8-سىنىپ وقۋشىسى ولجاس قۇلجابايەۆ بەكىرە بالىعىن تۇڭعىش كورىپ وتىر. سوندىقتان دا ول بۇگىن ءوز قۇربىلارىمەن بىرگە ارنايى اكۆاريۋمگە سالىنعان الۋان ءتۇرلى بەكىرە بالىعىن تاماشالاۋدان جالىعار ەمەس.
ءسابي ساناعا ساۋلە شاشقان شارا وبلىستا بيىل كوپشىلىك ءۇشىن تۇڭعىش رەت ۇيىمداستىرىلىپ وتىر. سودان با، قىزىقتاۋشىلاردىڭ دا قاراسى مول. جايىق- اتىراۋ بەكىرە بالىعىن ءوسىرۋ زاۋىتى جىلدار بويى جيعان تاجىريبەسى مەن وندىرگەن ءونىمىن كوپشىلىك نازارىنا ۇسىندى. شاراعا بالىق ونەركاسىبىنىڭ ارداگەرلەرى، قالا تۇرعىندارى مەن مەكتەپ وقۋشىلارى كوپتەپ شاقىرىلعان.
16 جىلدان بەرى بەكىرە بالىعىن قولدان كوبەيتىپ كەلە جاتقان زاۋىت ۇجىمى وسى جىلدار ىشىندە 60 ميلليونعا جۋىق شاباق ءوسىرىپ، جايىق- كاسپي باسسەينىنە جىبەرگەن. بالىق وسىرۋشىلەر مۇنداي شارانى جىل سايىن تۇراقتى وتكىزۋدى جوسپارلاپ وتىر. ماقسات - جايىق- كاسپي باسسەينىنىڭ باعا جەتپەس بايلىعى سانالاتىن بەكىرە بالىعىنا كوپشىلىكتىڭ كوڭىلىن اۋدارۋ. سەبەبى تۇلىكتىڭ تولدەن وسەتىنى سەكىلدى بۇگىن بالالار قولىمەن تابيعي ورىسىنە جىبەرىلگەن شاباقتار اراعا جىلدار سالىپ تەڭىز قازىناسىن تولىقتىرارى ءسوزسىز.
