21:34, 04 - مامىر 2023 | GMT +5
جەتىسۋ وبلىسىندا 15 جىل بويى ىزدەۋدە جۇرگەن ازامات ۇستالدى
تالدىقورعان. قازاقپارات - جەتىسۋ وبلىسىندا 15 جىل بويى ىزدەۋدە جۇرگەن ازامات ۇستالدى، - دەپ حابارلايدى قازاقپارات ءتىلشىسى.
جەتىسۋ وبلىسى پوليتسيا دەپارتامەنتىنىڭ جەدەل ۋاكىلدەرى كوكسۋ اۋدانىندا 51 جاستاعى ەر ادامدى ۇستادى. ول 2008 -جىلدان بەرى رەسەيدە ەسىرتكىمەن بايلانىستى قىلمىس جاسادى دەگەن كۇدىكپەن مەملەكەتارالىق ىزدەۋدە جۇرگەن.
«جەتىسۋ پوليتسەيلەرى رەسەي فەدەراتسياسىنىڭ كراسنويارسك ولكەسى قۇقىق قورعاۋ ورگاندارىنىڭ ىزدەستىرۋ ءوتىنىشىن ورىنداپ، ولارعا كۇدىكتىنىڭ ورنالاسقان جەرى تۋرالى اقپاراتتى جىبەردى. بەلگىلەنگەن ەر ادامعا قاتىستى ءىستىڭ بارلىق ءمان- جايلارى انىقتالعانعا دەيىن «كەلۋ تۋرالى مىندەتتەمە» بۇلتارتپاۋ شاراسى تاڭدالدى»، - دەلىنگەن جەتىسۋ وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاماسىندا.
