مارالدى التىن فابريكاسىنىڭ ماسەلەسىن 15- مامىرعا دەيىن شەشەمىز - مارات قارابايەۆ
«شىعىس قازاقستان وبلىسى كۇرشىم اۋدانىنىڭ مارالدى اۋىلىندا التىن وندىرەتىن فابريكا سالۋ ءالى كۇن تارتىبىندە تۇر ما؟ھ» - دەپ سۇرادى ب ا ق وكىلدەرى.
مينيستر كەلەسى اپتادا وسى ماسەلە بويىنشا سونداعى حالىقپەن جان- جاقتى كەزدەسۋ وتكىزۋدى جوسپارلاپ وتىرعانىن ايتتى.
«جالپى، ول زاۋىت بويىنشا ءبىز كەلەسى اپتادا اكىمدىكتىڭ وكىلىمەن جانە جەرگىلىكتى حالىقپەن قوسىمشا كەزدەسۋ وتكىزەمىز. ودان كەيىن عانا جاۋاپ بەرەمىن. ويتكەنى، بىرنەشە ماسەلە بار. ايتىپ وتىرعانىڭىز دۇرىس. ەكى تاراپ ءبىر- بىرىمەن كەلىسىمگە كەلىپ وتىرعان جوق. سوندىقتان، 9- مامىر مەرەكەسى وتكەن سوڭ بارشاسىنىڭ باسىن قوسىپ، قوسىمشا مالىمەتىن بەرەمىز.
فابريكا سالۋ ماسەلەسى، باسقا دا بارلىق ماسەلە ءالى كۇن تارتىبىندە تۇر. قازىر ناقتى مىنانداي شەشىم قابىلداندى دەپ ايتا المايمىن. ويتكەنى، كەلەسى اپتادا ءار تاراپتى تىڭداپ قانا جاۋابىن ايتامىز. شامالى سابىر ساقتاڭىزدار. مەيرامنان كەيىن 15- مامىرعا دەيىن قوسىمشا ايتامىز» ، - دەدى مارات قارابايەۆ.
