13:50, 31 - قاڭتار 2023 | GMT +6
سەمەيدە ۇيىنەن كەتىپ قالعان 15 جاسار قىز كوشەدەن تابىلدى
سەمەي. قازاقپارات - اباي وبلىسىنىڭ پوليتسەيلەرى جوعالعان 15 جاسار قىزدى تاپتى، دەپ حابارلايدى قازاقپارات وبلىستىق پوليتسياعا سىلتەمە جاساپ.
30-قاڭتاردا «102» ارناسىنا 34 جاستاعى قالا تۇرعىنى حابارلاسىپ، 15 جاسار قىزىنىڭ جوعالىپ كەتكەنىن جەتكىزگەن. قىز سول كۇنى ۇيىنەن شىعىپ كەتكەننەن قايتىپ ورالماعان.
اتالعان فاكتى اۋەزوۆ پوليتسيا بولىمىندە تىركەلدى. اباي وبلىسى پ د اۋماقتىق بولىمشەلەرىنىڭ بۇكىل جەكە قۇرامى قىزدى ىزدەۋگە كىرىستى.
وعان 150 دەن استام پوليتسيا قىزمەتكەرى مەن ەرىكتىلەر اتسالىستى.
ىزدەۋ شارالارى بارىسىندا قۇقىق قورعاۋ ورگاندارى جوعالعان ادام بولۋى مۇمكىن جەرلەردى قاراپ شىقتى.
وسى جۇمىستىڭ بارىسىندا وبلىس ورتالىعىنىڭ تۇرعىنى قىزدىڭ شامامەن قايدا جۇرگەنىن ايتقان.
سونىڭ كومەگىمەن پوليتسيا قىزمەتكەرى قىزدى كوشەدەن تاپتى.
قازىرگى ۋاقىتتا بالا اتا-اناسىنىڭ جانىندا، ونىمەن پروفيلاكتيكالىق اڭگىمە جۇرگىزىلدى.