كۇن رايىنىڭ قولايسىزدىعىنان قوزعالىس شەكتەلۋىن ەسكەرمەي جولعا شىققاندار 15 تاۋلىككە قامالادى

«جولداردا كولىك قۇرالدارىنىڭ ءجۇرىسىن توقتاتۋ نەمەسە ۋاقىتشا شەكتەۋ قاعيدالارىن بەكىتۋ تۋرالى» ۇكىمەت قاۋلىسىنا وسىنداي وزگەرىس ەنگىزىلدى، دەپ حابارلايدى قازاقپارات ءتىلشىسى.

«جول ءجۇرىسى قاۋىپسىزدىگىن قامتاماسىز ەتۋ جونىندەگى ۋاكىلەتتى ورگاننىڭ زاڭدى تالاپتارىنا باعىنباۋ فاكتىلەرى انىقتالعان جاعدايلاردا، كولىك قۇرالدارىنىڭ جۇرگىزۋشىلەرىنە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 667-بابىنا سايكەس شارالار قابىلدانادى»، - دەلىنگەن قۇجاتتا.

كودەكستىڭ سايكەس بابى پوليسيا قىزمەتكەرلەرىنىڭ زاڭدى وكىمىنە باعىنباعاندارعا قاتىستى قولدانىلادى.

«قۇقىق قورعاۋ ورگانى نەمەسە ارناۋلى مەملەكەتتىك ورگان، اسكەري پوليتسيا ورگانى، مەملەكەتتىك فەلدەگەرلىك قىزمەت قىزمەتكەرىنىڭ (اسكەري قىزمەتشىسىنىڭ) ، سوت ورىنداۋشىسىنىڭ زاڭدى وكىمىنە باعىنباۋ، ولاردىڭ قىزمەتىنە كەدەرگى كەلتىرۋ ەسكەرتۋ جاساۋعا نەمەسە 30 ا ە ك (91890 تەڭگە) مولشەرىندە ايىپپۇل سالۋعا، نە 15 تاۋلىككە دەيىنگى مەرزىمگە اكىمشىلىك قاماققا الۋعا الىپ كەلەدى»، - دەپ كورسەتىلگەن كودەكستىڭ جاڭا رەداكتسياسىندا.

پوليسيا ەسكەرتپەسىن ەلەمەي، ءبىر جىل ىشىندە وسىنداي ارەكەتىن قايتالاعان جۇرگىزۋشىلەر 20 تاۋلىككە دەيىن قاماۋعا الىنادى. ال، قاماۋعا الىنبايتىندار (مۇمكىندىگى شەكتەۋلى ادامدار) ساناتىنداعىلارعا 50 ا ە ك (152150 تەڭگە) مولشەرىندە ايىپپۇل سالىنادى.

ەسكە سالساق، 11-شىلدەدە مەملەكەت باسشىسى «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.