جەتىسۋ وبلىسىنىڭ 15 جاستاعى قىز زورلانعان اۋدانىندا پوليتسيا جاساقتارى كۇشەيتىلدى
قىلمىسكەر قالعان ءومىرىن تۇرمەدە وتكىزۋى مۇمكىن. بۇل تۋرالى ءوڭىردىڭ پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«پانفيلوۆ اۋدانىنىڭ شولاقاي اۋىلىندا كامەلەتكە تولماعان بالانى زورلاۋ جانە ءولتىرۋ فاكتىسى بويىنشا تەرگەۋ جۇمىستارى وبلىستىق پوليتسيا دەپارتامەنتى باسشىلىعىنىڭ ەرەكشە باقىلاۋىنا الىندى. اسا اۋىر قىلمىس جاسادى دەگەن كۇدىكتى انىقتالىپ، قاماۋعا الىندى. تەرگەۋ بارىسىندا كۇدىككە ىلىگىپ، ۇستالعان جەرگىلىكتى تۇرعىننىڭ 1984 -جىلى تۋعانى جانە بۇعان دەيىن قىلمىستىق جاۋاپكەرشىلىككە تارتىلعانى انىقتالدى. سونداي-اق ونىڭ ايۋاندىقپەن جاساعان قىلمىسىنىڭ ىزدەرىن جاسىرۋ ماقساتىندا ءمايىتتى ورتەۋگە تىرىسقانى بەلگىلى بولدى. اتالعان دەرەك بويىنشا ق ر ق ك 99-بابى 2-بولىگى (ادام ءولتىرۋ)، 10-تارماعى (باسقا قىلمىستى جاسىرۋ ماقساتىندا) جانە 14-تارماعى (كورىنەۋ كامەلەتكە تولماعان ادامدى ءولتىرۋ)، سونداي- اق ق ر ق ك 120-بابى 3-بولىگى 1-تارماعى (كامەلەتكە تولماعان ادامدى زورلاۋ) بويىنشا سوتقا دەيىنگى تەرگەۋ امالدارى جۇرگىزىلىپ جاتىر. قازاقستان زاڭناماسىنىڭ تالاپتارىنا سايكەس اسا اۋىر قىلمىسى ءۇشىن ول ءومىر بويىنا باس بوستاندىعىنان ايىرىلۋى مۇمكىن»، - دەلىنگەن جەتىسۋ وبلىسى پوليتسيا دەپارتامەنتىنىڭ حابارلاماسىندا.
ۆەدومستۆونىڭ اقپاراتىنا سايكەس، اتالعان قىلمىستى وبلىستىق دەپارتامەنتتىڭ قىزمەتكەرلەرى مەن پانفيلوۆ اۋدانىنىڭ پوليتسەيلەرى بىرلەسىپ اشكەرەلەدى. قازىرگى ۋاقىتتا بولعان وقيعانىڭ بارلىق ءمان-جايىن انىقتاۋ ماقساتىندا تەرگەۋ ءىس- شارالارى تولىققاندى جۇرگىزىلۋدە. دەرەك بويىنشا قاجەتتى ساراپتامالار تاعايىندالدى. جابىرلەنۋشى تاراپتىڭ جاس ءوسپىرىم قىزدىڭ ولىمىنە باسقا دا ادامداردىڭ قاتىسى بولۋى مۇمكىن دەگەن پايىمى ەسكەرىلىپ، سوتقا دەيىنگى تەرگەۋ بارىسىندا كۇمان تۋدىرعان جايتتار جان- جاقتى تەكسەرىلمەك.
«تەرگەۋ جۇمىستارىنا وبلىستىق پوليتسيانىڭ تەرگەۋ باسقارماسىنداعى ەڭ تاجىريبەلى قىزمەتكەرلەر جۇمىلدىرىلدى»، - دەدى ۆەدومستۆودان.
ءمالىم ەتىلگەندەي، قازىر پانفيلوۆ اۋدانىندا پوليتسيا جاساقتارى كۇشەيتىلگەن جۇمىس رەجيمىنە كوشىرىلدى.
«ايتا كەتەيىك، الەۋمەتتىك جەلىلەردە وسى دەرەككە قاتىستى جالعان اقپارات توقتاۋسىز تاراتىلىپ جاتىر. بۇل ءۇردىس قوعامدىق كوڭىل-كۇيدى بۇزىپ، قۇقىق قورعاۋ ورگاندارىنا سەنىمسىزدىك تۋدىرۋدا. وسىعان وراي، قولدانىستاعى زاڭناماعا سايكەس كورىنەۋ جالعان اقپارات تاراتقانى ءۇشىن جاۋاپكەرشىلىك قاراستىرىلعانىن ەسكەرتەمىز جانە ازاماتتاردان تەك رەسمي دەرەك كوزدەرىنە سەنىم ءبىلدىرۋىن سۇرايمىز. سونداي-اق تۋىستارىنىڭ كامەلەتكە تولماعان قىزدى ءوز بەتىنشە ىزدەۋ جۇمىستارىنىڭ ناتيجەسى بولماعاننان كەيىن پوليتسيانىڭ كومەگىنە جۇگىنگەنى جانە ءتارتىپ ساقشىلارى جاس ءوسپىرىم قىزدىڭ ءىز-ءتۇزسىز جوعالعانى تۋرالى دەرەكتى دەرەۋ تىركەپ، ىزدەۋ امالدارىنا كىرىسكەنىن اتاپ وتەمىز. سونىمەن قاتار تۋىنداعان قوعامدىق رەزونانسقا بايلانىستى پانفيلوۆ اۋدانىندا پوليتسيا جاساقتارى كۇشەيتىلگەنىن حابارلايمىز. ەلدى مەكەندەردەگى قۇقىقتىق ءتارتىپ باقىلاۋعا الىندى»، - دەپ تولىقتىردى اتالعان ۆەدومستۆونىڭ باسپا ءسوز قىزمەتىنەن.
ەسكە سالايىق، پانفيلوۆ اۋدانىنىڭ شولاقاي اۋىلىندا 15 جاستاعى وقۋشى قىزدى 38 جاستاعى ەر ادام زورلاپ، ءولتىردى دەگەن كۇدىكپەن ۇستالعانىن حابارلاعان بولاتىنبىز.
اۆتور سامال قابىشەۆا
