قازاقستاندا اياق كيىم ءبىر جىلدا %15 عا جۋىق قىمباتتاپ كەتكەن
نۇر-سۇلتان. قازاقپارات - ءبىر جىلدا قازاقستاندا اياق كيىم %10 قىمباتتاعان. بۇل تۋرالى قازاقپارات energyprom.kz سايتىنا سىلتەمە جاساپ حابارلايدى.
2022 -جىلدىڭ قاڭتار- مامىر ايلارىندا قازاقستاندا 546 مىڭ جۇپ اياقكيىم شىعارىلعان. بۇل بىلتىرعى كورسەتكىشتەن %13,3 از. وڭىرلەر اراسىندا بۇل كورسەتكىش بويىنشا الماتى قالاسى الدا تۇر - 253,3 مىڭ جۇپ اياقكيىم وندىرىلگەن.
ودان كەيىن جامبىل (73,4 مىڭ جۇپ) جانە الماتى (57,9 مىڭ جۇپ) وبلىستارى تۇر.
«وتاندىق وندىرۋشىلەر 2022 -جىلدىڭ ءبىرىنشى توقسانىندا حالىق سۇرانىسىنىڭ تەك %4,2 ىن عانا قاناعاتتاندىرعان. ياعني، بۇكىل نارىق يمپورتقا تاۋەلدى دەۋگە بولادى. قاڭتار- ناۋرىز ارالىعىندا ەلگە سىرتتان 6,9 ميلليون جۇپ اقكيىم اكەلىنگەن. ءبىر قۋانتارلىعى، بۇل كورسەتكىش 2021 -جىلعىدان 2,6 ەسە از»، - دەپ جازىلعان سايتتا شىققان اقپاراتتا.
2022 -جىلدىڭ مامىر ايىنداعى قورىتىندى بويىنشا، اياقكيىم باعاسى %9,7 وسكەن.
energyprom.kz-تىڭ جازۋىنشا، كەيىنگى 4 جىلدا ءبىرىنشى رەت وسىنداي قىمباتشىلىق بايقالىپ وتىر. وڭىرلەردەگى قىمباتتاۋ دەڭگەيى ءار ءتۇرلى. قوستاناي وبلىسىندا %4,9 بولسا، ماڭعىستاۋ وبلىسىندا %19,5 وسكەن. ءبىر جىل ىشىندە بارىنەن بۇرىن بالالار اياق كيىمى - %14,2. ايەلدەر اياق كيىمى %8,8، ەرلەر اياق كيىمى %7,9 قىمباتتادى.
اۆتور: ەسىمجان ناقتىباي
