اتىراۋدا تۇرعىنداردىڭ سەرۋەندەۋىنە كەدەرگى كەلتىرگەن 15 ۆەلوسيپەدشى جازالاندى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، اتىراۋ قالاسىنداعى ۆەلوسيپەدشىلەردىڭ جايىق وزەنىنىڭ جاعالاۋىندا ساعات 19:00-23:00 ارالىعىندا جۇرۋىنە تىيىم سالىنعان.
«ءبىراق، ۆەلوسيپەدشىلەر بۇل تىيىمدى ەسكەرمەيدى. ءسويتىپ، ۆەلوسيپەدشىلەر تىيىم سالىنعان ۋاقىتتا جاعالاۋدا ءجۇرىپ، تۇرعىنداردىڭ سەرۋەندەۋىنە كەدەرگى كەلتىرەدى. سول سەبەپتەن، تۇرعىندار تاراپىنان شاعىم كوبەيدى. وسىعان بايلانىستى اتىراۋ قالالىق پوليتسيا باسقارماسىنىڭ پاترۋلدىك پوليتسيا قۇرامىنان جاياۋ پاترۋلدەۋ بەكەتى ۇيىمداستىرىلدى. وتكەن اپتادا جايىق جاعالاۋىندا ساعات 19:00-23:00 ارالىعىندا ۆەلوسيپەدپەن جۇرگەن 15 ادام انىقتالدى» - دەپ حابارلادى دەپارتامەنتتىڭ باسپا ءسوز قىزمەتى.
ۆەلوسيپەدپەن تۇرعىنداردىڭ سەرۋەندەۋىنە كەدەرگى كەلتىرگەندەرگە قاتىستى ق ر اكىمشىلىك قۇقىقبۇزۋشىلىق تۋرالى كودەكسىنىڭ 615-بابىمەن اكىمشىلىك حاتتاما تولتىرىلىپ، ءارقايسىسىنا 2-ايلىق ەسەپتىك كورسەتكىش كولەمىندە ايىپپۇل سالىندى.