ارقالىقتا 15 جاسار جاس ءوسپىرىم ءوتىپ بارا جاتقان قىزدارعا وق اتقان

3- مامىردا ارقالىق قالاسىنىڭ پوليتسيا بولىمىنە اۋرۋحانادان 17 جانە 25 جاستاعى تۇرعىنداردىڭ جاراقات العاندىعى تۋرالى حابارلاما تۇسكەن.

ولار بىلەك پەن جامباس تۇسىنان وق ءتيىپ، جەدەل جاردەم بولىمىنە جەتكىزىلگەن.

«العاشقى تەرگەۋ ارەكەتتەرى بارىسىندا قىزداردىڭ ماياسوۆا كوشەسىمەن ءوتىپ بارا جاتىپ تارسىلدى ەستىگەنى، سودان كەيىن قول-اياقتارىنا جاراقات تۇسكەنى انىقتالدى. قىزدار اۋرۋحاناعا جەتكىزىلىپ، ولارعا العاشقى مەديتسينالىق كومەك كورسەتىلدى. قازىرگى ۋاقىتتا «دەنساۋلىققا قاساقانا اۋىر زيان كەلتىرۋ» بابى بويىنشا سوتقا دەيىنگى تەرگەۋ امالدارى جۇرگىزىلۋدە. وقيعا ورنىندا پنيەۆماتيكالىق قارۋدىڭ وعى تابىلدى»، - دەپ ءتۇسىندىردى پوليتسيا دەپارتامەنتىندە.

قازىرگى ۋاقىتتا ساراپتاما تاعايىندالىپ، تەرگەۋ ءجۇرىپ جاتىر.

«پوليتسيا اكەسىنە تيەسىلى پنيەۆماتيكالىق مىلتىقتان وق اتقان 15 جاستاعى جاس ءوسپىرىمنىڭ كىم ەكەنىن انىقتادى. قازىرگى ۋاقىتتا اتا-اناسىنا قاتىستى «كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ» بابى بويىنشا اكىمشىلىك ءىس قوزعالدى»، - دەدى پوليتسيادا.