قازاقستاندا 15 شوگىندى الاپقا گەولوگيالىق بارلاۋ جۇرگىزۋ كەرەك - ماعزۇم مىرزاعاليەۆ
قازاقستاننىڭ ەكولوگيا، گەولوگيا جانە تابيعي رەسۋرستار مينيسترلىگى ەلىمىزدىڭ گەولوگيالىق بارلاۋ سالاسىنا ءىرى شەتەلدىك ينۆەستورلار تارتۋ جونىندەگى ماركەتينگتىك ستراتەگيانى، سونداي- اق road-show ازىرلەۋدى جوسپارلاپ وتىر. بۇل تۋرالى ۆەدومستۆو باسشىسى ماعزۇم مىرزاعاليەۆ ءوزىنىڭ Twitter پاراقشاسىندا حابارلادى.
ءمينيستردىڭ ايتۋىنشا، بۇگىندە قازاقستاندا جالپى وندىرىلگەن كومىرسۋتەك رەسۋرسى 76,4 ميلليارد توننا مۇناي ەكۆيۆالەنتىنە تەڭ كەلەدى. زەرتتەۋدى قاجەت ەتەتىن 15 شوگىندى الاپ بار.
«ەلىمىزدىڭ گەولوگيالىق بارلاۋ سالاسىنداعى ستراتەگيالىق مىندەتىنىڭ ءبىرى - جاڭا كەن ورىندارىن اشۋدا ماڭىزى زور ينۆەستيتسيا تارتۋ»، - دەپ جازدى دۇيسەنبىدە م. مىرزاعاليەۆ.
«ەلىمىزدىڭ گەولوگيالىق بارلاۋ سالاسىنا ءىرى شەتەل ينۆەستورلارىن تارتۋ، نەگىزگى الەمدىك نۇكتەلەردە ەلىمىزدىڭ ينۆەستيتسيالىق، گەولوگيالىق الەۋەتىن كورسەتۋ ماقساتىمەن road-show ۇيىمداستىرۋ بويىنشا تاۋەلسىز ساراپتاما جاساۋداعى جانە ءتيىمدى ستراتەگيا دايىنداۋداعى كوشباسشى - IHS Markit كومپانياسىمەن ماركەتينگتىك ستراتەگيا ازىرلەۋ ماسەلەسىن تالقىلادىق»، - دەدى مينيستر.
ءمينيستردىڭ سوزىنە قاراعاندا، ينۆەستيتسيا تارتۋ زاماناۋي تەحنولوگيالار ارقىلى كەشەندى گەولوگيالىق بارلاۋ جۇمىسىن جۇرگىزۋگە مۇمكىندىك بەرەدى.
«بۇل اسا تەرەڭ باسسەيندەردىڭ بارلىق اۋماعىنداعى گەولوگيالىق قۇرىلىمنىڭ ءدال كەسكىنىن بەرىپ قانا قويماي، ءوز الەۋەتىمىزدى بارىنشا باعامداۋعا، جاڭا كەن ورىندارى مەن جاڭا كەلەشەكتىڭ كىلتىن اشۋعا، جۇمىس ورىندارىن قۇرۋعا مۇمكىندىك بەرەدى»، - دەپ اتاپ ءوتتى مينيستر.