ەڭلىك ءابدىقادىر: ورتا ەسەپپەن ايىنا 15 ميلليون تەڭگە تابامىن
24 جاستاعى ارۋدىڭ باستى ماقساتى - بۇرىنعى دانا قىزداردىڭ ۇلگىسى مەن زامانۋي قىزداردىڭ ۇلگىسىن قوسىپ، يدەالدى تۇرعىدان قازاق قىزدارىن تاربيەلەپ شىعۋ.
بۇل تۋرالى ول OINET. KZ سايتىنا بەرگەن سۇحباتىندا ايتتى.
- ءسىزدىڭ بىرنەشە ءىستى قاتار الىپ جۇرەتىنىڭىز ءمالىم. ءبىراق ايەدەر قاۋىمى، قىزدار الەمىمەن كوبىرەك جۇمىس جاسايسىز. نەگە وسى باعىتتى ۇستاندىڭىز؟ قىزدار قاۋىمىنا كوڭىل تولماۋشىلىق بار ما؟
- قازىرگى تاڭدا قىزداردىڭ ۋاقىتتى دۇرىس جۇمساماۋى، ەرىنشەكتىك، جالقاۋلىق بار، ءوزىن دامىتپاۋى، وقىماۋى دەگەن سياقتى نارسەلەر مەنى الاڭداتادى. قوعامدا ايەل ادام ءبىلىمدى، اقىلدى بولسا، ءبىزدىڭ ۇرپاق تا سانالى بولادى. مەن ايەلدەر قاۋىمىنا الدىمەن وتباسى قۇندىلىقتارى تۋرالى ايتامىن، ودان سوڭ بارىپ كاسىپ اشۋ جايىندا ءسوز قوزعايمىن.
سەبەبى، ۇيدە اسحانانىڭ توڭىرەگىندە عانا جۇرگەن ايەلگە ءوزىنىڭ ەر ادامى دا ۇزاق ۋاقىت قىزىقپايدى. ايەل ادامىنىڭ ءبىلىمدى، دانا بولۋى مىندەتتى.
تاريحتىڭ وزىنە كوز جۇگىرتسەك، ۇلپان، زەرە، ۇلجان انالارىمىز بارلىعىندا دا ايەل ادامىنىڭ دانالىعى ءبىرىنشى ورىندا تۇرادى. ال قازىر تاربيە وزگەرگەن. سوندىقتان قىزداردىڭ بويىنداعى دانالىق، تەكتىلىك، ار- يبا، ادالدىق دەگەن قاسيەتتەر ءوشىپ بارادى. مەنىڭ ءبىرىنشى ماقساتىم - بۇرىڭعى قىزداردىڭ ۇلگىسى مەن زامانۋي قىزداردىڭ ۇلگىسىن قوسىپ وتىرىپ، يدەالدى تۇرعىدان قازاق قىزدارىن تاربيەلەپ شىعۋ.
- وتباسى نەمەسە كارەرا، مانساپ الدە ماحاببات؟
- مەن ءۇشىن وتباسى ماڭىزدى. مەن دايىنمىن، قابىلەتىمنىڭ بارلىعىن ۇرپاعىما بەرۋگە. مەن بارىمدى سالامىن، دانالىعىمدى ەر- ازاماتىمنىڭ ابىرويىن اسقاقتاتۋعا جۇمساۋعا. مەن ءازىرمىن، ۇلكەن اۋلەتتىڭ اق جاۋلىقتى كەلىنى بولۋعا. مەن تىرىسامىن، اتا- ەنەمنىڭ الدىندا ۇلگىلى كەلىن بولۋعا. مەن مىندەتىمدى جاقسى بىلەمىن. قازاقيلىقتان اۋىتقىپ، كاسىپتى قۋالاپ كەتكەن، اقشانىڭ سوڭىنان جۇرگەن ادام ەمەسپىن. الدىمەن قازاق قىزدارىن تاربيەلەپ الۋىم كەرەك. سەبەبى ەرتەڭ بۇل قوعامعا قىزعالداقتاي قىزدارىم، ار- وجداندى ۇلدارىم كەلەدى. ولاردىڭ دا تەكتى بولعانىن قالايمىن. كەيىن ولار جار تاڭداعان كەزدە مەن تاربيەلەپ كەتكەن قىزدارمەن قىزىن كەلىن قىلعىم كەلەدى. دانا انا ازايىپ، اقىل ايتاتىن اجەنىڭ جوقتىعىنان قانشاما وتباسىلىق ءومىر قيراپ جاتىر.
- تۇرمىس قۇرماعانسىز، ءبىراق ايەلدەر قاۋىمىنا وتباسى جايلى كەڭەس بەرەسىز. وسى تۇرعىدان سىزگە سىن ايتۋشىلار بار ما؟
- ادامدى جاسىمەن ەمەس، باسىمەن سىناققا الۋ كەرەك. ءيا، ءجيى ايتىلادى. مەنىڭ ول سىنعا ەتىم دە ۇيرەنە باستادى. اللا قالاسا، مەن بارىنە قىرسىققاندا كەرەمەت كەلىن بولامىن. امال ارەكەتكە قاراعاندا نيەت قايىرلى. قالاي نيەتتەنەسىڭ سولاي بولادى. جانە بەس بالالى اناعا قاراعاندا تارازى باسىنا قوياتىن بولساق، مەنىڭ ءبىلىمىم ارتىق بولادى. ويتكەنى مەن ونى تاجىريبە جۇزىندە كورمەگەنىممەن كاسىبي تۇرعىدا ءبىلىم رەتىندە العانمىن.
ەڭ الدىمەن، امانجول رىسمەنديەۆتىڭ ترەنينگتەرىنە قاتىستىم. سودان سوڭ الماتىعا ارنايى ءىسساپارمەن كيەۆتەن كەلگەن مامانداردان ن ل پ پراكتيك، ياعني نەيرولينگۆيستيكالىق پروگرامما بويىنشا ادامنىڭ ىشكى جاعدايى مەن ميىمەن جۇمىس جاسايتىن باعىت بويىنشا ترەنەرلەردەن ساباق الدىم. ۋكراينادان كەلگەن يرينا دوروگۋشتىڭ جەكە كونسۋلتاتسياسىنان ءوتتىم.
جانە ت م د بويىنشا ن ل پ سالاسىنان ساباق بەرۋگە تولىقتاي قۇقىعىم بار. كۋالىك بەرىلگەن. ال قازىرگى ۋاقىتتا ماسكەۋ پسيحواناليتيكا ينستيتۋتىندا جالپى پسيحولوگيا جانە كوۋچينگ مامندىعىنىڭ 1-كۋرس ماگيسترانتىمىن. بيىل ءۇشىنشى جىل وسى پسيحولوگيا سالاسىن زەرتتەپ، ءبىلىپ جاتقانىما.
- بيزنەس ترەنينگتەردە قاتىسقان ادامدار باسىندا الىپ-ۇشىپ تۇرادى دا، ەكى كۇننەن سوڭ ءسونىپ قالادى. ءسىزدىڭ دە ارنايى كۋرستارىڭىزدان سوڭ ەش ناتيجە بولماعانىن ايتىپ، شاعىم تۇسىرگەندەر بار ما؟
- قىزدار مەنىڭ جەكە باعدارلامالارىمدى العاننان كەيىن، مەنىمەن بايلانىس ۇزبەۋگە تىرىسىپ، جابىسىپ الادى. قاي ترەنەردىڭ ساباعىن السا دا، 70 پايىز ادامنىڭ وزىنە بايلانىستى. ءبىز ولاردى ارەكەتكە باعىتتايمىز، ال ارى قاراي ادامنىڭ وزىنە بايلانىستى. ول 100 مىڭ تەڭگەسىن بىزگە بەرگەن سوڭ ەكى ەسە قىلىپ شىعارىپ الماي ما؟ نەگە بىزدەن كومەك كۇتەدى؟
ول - اقىماقتىق. وقىعان بولەك، توقىعان بولەك قوي. جەتىستىككە جەتكىسى كەلەتىن ادامنىڭ وزىنەن اسقان جاۋى جوق. مۇمكىندىكتى دە اشىپ بەرەتىن ءوزى، جاۋىپ تاستايتىن دا ءوزى. بۇل جەردە ءبىلىم بەرگەن ترەنەردىڭ كىناسى ەمەس، ارى قاراي ارەكەت جاساماعان ادامنىڭ ءوزى كىنالى. ال ءبىزدىڭ ترەنينگتەردەن ناتيجە شىعارىپ جاتقاندار وتە كوپ. ايتپاقشى، مەنىڭ بيلەتتەرىم ءقازىر ونداي قىمبات ەمەس. ءبىراق جۋىردا باعاسىن كوتەرەمىز. سەبەبى مەنىڭ ءبىلىمىم ارتقان سايىن، ترەنينگ باعاسى دا وسەدى. ول ادامىنىڭ وزىنە دەگەن باعاسى.
- قىزدارعا جەكە كونسۋلتاتسيا بەرەسىز. قانشا قىز ءوتتى الدىڭىزدان؟ قازىرگى تاڭدا ولاردى مازالاپ جۇرگەن نە ەكەن؟
- 3000 عا جۋىق قىز الدىمنان ءوتتى. ءبىر كۇندە جوق دەگەندە 5-7 ادام قابىلدايمىن. ەڭ ءجيى قوزعالاتىن تاقىرىپ: اداسۋشىلىق، ءوزىن تاپپاۋشىلىق، ماماندىعىنا رەنىش، جىگىتپەن قارىم- قاتىناس، وتباسىلىق ماسەلە جانە اجىراسۋ. ماعان كوبىنە «ەڭلىك حانىم مەن كىم بولامىن؟ » دەپ كەلەدى. 30-40 جاسقا كەلگەنشە ءوزىن تاپپاي جۇرگەندەر بار. اينالىساتىن سۇيىكتى ءىسى جوق. كۇيەۋىمەن ورتادا بەرەكە جوق. ومىردە ءوزىن تاپقان ادام، وتباسىندا دا ءوزىن تابادى. وسى نارسەنى ۇمىتپاۋ كەرەك.
- ترەنينگ، جەكە كونسۋلتاتسيادا ءوزىڭىزدى قالاي ۇستاساڭىز، ومىردە دە سوندايسىز با؟
- مىسالى، مەن ينستاگرام جەلىسىنە تەك شىنايى ءومىرىمدى سالامىن. سەبەبى ول جەردە مەنەن قانشاما قىز ۇلگى الىپ وتىر. مەن ارتىمدى باعامدايمىن. كۇنىمدى دە ءومىرىمدى دە ماعىناعا تولتىرعىم كەلەدى. ءبىر رەت جۇمىسقا دجينسى شالبار كيىپ، قۇلاققاپ تاعىپ كەتىپ بارا جاتسام، كوشەدەن ءبىر قىز مەنى ۇستاپ الدى. «ءسىز ناۋشنيك تىڭدايسىز با؟ دجينسى كيەسىز بە؟ ساعىز شاينايسىز با؟، - دەيدى. سول كەزدە ءتۇسىندىم ماعان قالاي بولسا سولاي جۇرۋگە بولمايتىنىن.
- دەمەۋشىڭىز كىم؟
- «ول بىرەۋدىڭ توقالى شىعار، باي اكەنىڭ ەركە قىزى شىعار» دەپ كوپشىلىگى ويلايدى. مەنىڭ دەمەۋشىم - اللا! تىعىرىققا تىرەۋتىن دە، تىعىرىقتان شىعارىپ الاتىن دا ءبىر اللا. اۋلەتىمىزدە ەشقانداي مىقتى اعا- كوكەمىز جوق. اكەم - كولىك جۇرگىزۋشىسى، انام ءتىس ەمحاناسىندا مەيىربيكە. قاراپايىم وتباسىنىڭ قىزىمىن. ءبىراق بەرگەن تاربيەلەرىنىڭ ارقاسىندا وسى جەتىستىككە جەتىپ وتىرمىن.
- ەڭلىك ءابدىقادىر دەسە، كوز الدىمىزعا 2-كۋرسىندا العاشقى ميلليونىن تاپقان ستۋدەنت قىز كەلەدى. قالاي تاپتىڭىز؟ ودان بەرى ءبىرشاما ۋاقىت ءوتتى. قازىرگى تابىسىڭىز ودان قانشا ەسە كوپ؟
- 2014 -جىلى «اەن» اتتى پروديۋسەرلدىك ورتالىعىمدى اشىپ، العاشقى تابىسىمدى توي- تومالاقتان تاۋىپ ءجۇردىم. ءبىر كۇن 20 مىڭ، ەكىنشى كۇنى 30 مىڭ وسىلاي ءجۇرىپ قالاي ميلليونعا شىعىپ كەتكەنىمدى بايقاماي قالدىم. مەن العاشقى ارەندانى ستۋديامدى تۋىستارىما كورسەتىپ ءجۇرىپ، كورىمدىكپەن جاپقانمىن. جارىس بولسىن، پرەزيدەنتتىك شاكىرتاقى ەشقايسىسىن جىبەرمەيتىن ەدىم. قازىر اللاعا شۇكىر، مەن قازاقستانداعى ميلليونەرلەر قاتارىنا كىرەمىن. «ارماندار ورىندالادى» اتتى جۋرنالىم بار. ول - مەنىڭ يميدجىم.
كەزىندە قانشاما رەت مينۋسقا كىرگىزسە دە، قازىرگى تاڭدا جاقسى پايدا ءتۇسىپ وتىر. الماتىدا «ART crystal» بي جانە سۇلۋلىق ستۋديام بار. شىمكەنت، اقتاۋ، استانا جانە قىزىلوردادان اشۋ نيەتىم بار. جانە اللا قالاسا قاراشادا كىرگەن كەزدە ادامعا پوزيتيۆ سىيلايتىن ەرەكشە «Motivation» اتتى كافە اشىلايىن دەپ جاتىر.
مەن كاسىپكەرلەردىڭ بال ءونىمى، كيىم بۋتيكتەرىن دامىتۋ، ءدارىحانا، تيپوگرافيا سالاسىندا بيزنەستەرىن دامىتىپ بەرەمىن. مەنى قارجىلاندىرىپ وتىرعان ترەنينگ قانا ەمەس. ساحناعا شىعىپ سويلەۋ ول تەك مەنىڭ حوببيىم سەكىلدى. وسى ءتورت كاسىبىمنىڭ كىرىسىن قوسقاندا ورتا ەسەپپەن ايىنا 15000000 تەڭگە تابامىن.
- موتيۆاتسيانى، ەنەرگيانى قايدان الاسىز؟
ارماندارىمنان... مەن ارمانداپ جازامىن با، ورىندالعانشا تىنىم تاپپايمىن. ارماندارىما عاشىقپىن.
- ايەل رەتىندە نەدەن قورقاسىز؟
- جالعىز قالۋدان. قانشا جەردەن كۇشتى بولىپ اقىل ايتقىنىممەن، كەيدە ۋايىمدايمىن، ەر- ازاماتىمدى تاپپاي قالامىن با دەگەن سەكىلدى. «سەنىڭ وي- ءورىسىڭ، تابىسىڭ، بارلىعى دا ءوسىپ بارا جاتىر. ساعان لايىقتى جىگىت قايدان تابىلادى؟» دەپ سۇراپ قالعان كەزدە جاسقانىپ قالاتىنىم راس.
- سوندا سىزگە قانداي جىگىتتەر ۇنايدى؟ بولاشاق جارىڭىزعا قانداي تالاپتار قوياسىز؟
- مەن مىڭ رەت ويلانىپ، ون رەت تولعانىپ «اناۋ ءبۇيتىپ ايتتى، مىناۋ ءبۇيتىپ ايتتى» دەپ ايەلدەردىڭ تىرلىگىن ىستەپ جۇرگەن ەركەكتەردى سۋقانىم سۇيمەيدى. وكىنىشكە وراي قوعامدا ونداي ەركەكتەر قاپتاپ بارادى. بىرىنشىدەن، مەنىڭ ومىرىمەن جانە بالالارىمىزدىڭ ومىرىنە جاۋاپكەرشىلىگى ماڭىزدى. ول ماتەريالدىق تۇرعىدان ەمەس، مورالدىق تۇرعىدان دا قامتاماسىز ەتۋ كەرەك. جاۋاپكەرشىلىكتى سەزىنبەسە، ودان ادام شىعارۋ قيىن. ەر- ازاماتتى سوزىمەن ەمەس، ءىس- ارەكەتىمەن باعالايمىن.
- ون جىلدان سوڭ ەڭلىك ءابدىقادىر...
- ون جىلدان سوڭ مەن 34-تە بولامىن. ەڭ الدىمەن، سۇيىكتى جار، ۇلكەن اۋلەتتىڭ كەلىنى، 5 بالانىڭ اناسى بولامىن. ەڭلىك ءابدىقادىر برەندىن قالىپتاستىرامىن. مەن ونى باستاپ تا كەتتىم. «بريلليانت لەدي» دەگەن ماتاسىن ارنايى يتاليادان الدىرتىپ جاتقان مويىن ورامالدارىن شىعارىپ جاتىرمىن.
مۇنى تاققان ءار قىزدا مەنىڭ ەنەرگيام بولادى. ت م د ەلدەرىندە قازاقستاندا ءبىر مىقتى قىز بار دەپ ايتىپ جۇرەتىندەي تۇلعاعا اينالامىن. جانە قالاسام دا، قالاماسام دا مەن بيلىك باسىنا بارۋىم كەرەك. ول جاق مەنى ەلەپ، وزدەرى شاقىرادى. ودان كەيىن بەستسەللەر بولعان 5 كىتاپتىڭ اۆتورى بولامىن. 2019 -جىلى ءوزىمنىڭ كىتابىممەن قوسقاندا مەن 7 كىتاپ جازىپ شىعىپپىن.
- قازاق قىزدارىنا بەرەر كەڭەسىڭىز
- ءبىرىنشى ءوزىڭدى، ىشكى الەمىڭدى زەرتتە. ءتىپتى، قانداي گۇل ۇناتاتىنىنا دەيىن، قانداي ءاتىر ۇناتاسىڭ، قانداي ءتۇس ۇناتاتىنىن بىلمەيتىن قىزدار بار. ءوز ءوزىڭدى قالىپتاستىر، ەموتسياڭمەن جۇمىس جاسا. ءبىلىمىڭدى دامىت. دانالىققا بەت بۇر.
ءوزىڭدى قالىپتاستىرىپ العاننان سوڭ بارىپ، تۇرمىسقا شىق. جانە قانشا ماحاببات بولىپ تۇرسا دا، تۇبىندە دانالىق جەڭىپ شىعادى. «اناۋ مىقتى، مىناۋ وسال» دەپ ءومىر سۇرمەي، ءوز الەمىڭمەن ءومىر ءسۇر. بىرەۋدىڭ ءومىرىن ەمەس، ءوزىڭنىڭ ءومىرىڭدى زەرتتە.
سۇحباتتاسقان ماريا ساۋلەبەك قىزى
