ەلوردادا 15 شاقىرىمدىق الامان بايگە ءوتتى

نۇر-سۇلتان. قازاقپارات - ەلورداداعى «قازانات» يپپودرومىندا الامان بايگە ءوتتى، دەپ حابارلايدى قازاقپارات.

بۇل شارا «ەتنواۋىل» ۇلتتىق-مادەني دەمالىس كەشەنىنىڭ بيىلعى اشىلۋ سالتاناتىنا وراي وتكىزىلدى.

15 شاقىرىمدىق الامان بايگەگە ەلىمىزدىڭ تۇپكىر-تۇپكىرىنەن اكەلىنگەن جۇيرىكتەر قاتىستىرىلدى.

بايگەدە بابى مەن باعى قاتار وزعان ەلوردالىق ءومىرزاق نۇريسلامنىڭ «ءسات» اتتى جۇيرىگى مارەگە ءبىرىنشى جەتتى. ەكىنشى ماقسات تۇكەنوۆتىڭ «التىنكوز» تۇلپارى، ال ءۇشىنشى بولىپ قاراعاندىلىق اينار نىعىمەتوۆتىڭ «امانات» جۇيرىگى جەڭىس تۇعىرىنان كورىندى. ءتورتىنشى جانە بەسىنشى ورىنداردى الماتى وبلىسىنان كەلگەن ۇلان وماروۆتىڭ «شارتاسسى» مەن الماتىلىق ماقسات احايەۆتىڭ «نۇريسلام» اتتى تۇلپارلارى الدى.

 

 


 

 

 

 

ەلوردادا 15 شاقىرىمدىق الامان بايگە ءوتتىالاماندى كەلگەن قوناقتار «ەتنواۋىل» اۋماعىندا قازاقتىڭ ۇلتتىق تاعامىنان ءدام تاتىپ، قولونەر شەبەرلەرىنىڭ كورمەسىن تاماشالادى.

  

«بۇگىننەن باستاپ «ەتنواۋىل» ۇلتتىق مادەني كەشەنى ءوز ەسىگىن ايقارا اشتى. بۇل ءبىزدىڭ وتكىزىپ جاتقان العاشقى شارالارىمىزدىڭ ءبىرى. ەلوردا كۇنى قارساڭىندا 150 ات بايگەگە تىگىلەتىن ۇلكەن الامان ۇيىمداستىرۋدى جوسپارلاپ وتىرمىز. سونىمەن بىرگە، «ەتنواۋىل» كەشەنىنىڭ جۇمىستارىن جانداندىرۋدى قولعا الۋدامىز. بۇل جەر كوشپەندىلەردىڭ رۋحىن سەزىندىرەتىن، قازاق حالقىنىڭ باي تاريحىمەن، ونەرىمەن جانە داستۇرىمەن تانىستىراتىن جەر بولادى. ءبىز بولاشاقتا «ەتنواۋىلدى» بولاشاقتا قالانىڭ دامىلسىز تىرلىگىنەن جالىققاندار دەمالاتىن مەكەنگە اينالدىرعىمىز كەلەدى»، - دەيدى «بولات تۇياق» قوعامدىق بىرلەستىگىنىڭ ءتوراعاسى جاقىپ بايموللا ۇلى.

 

اۆتور: ريزابەك نۇسىپبەك ۇلى