ارىستانبەك مۇحامەدي ۇلى: ديماشتىڭ نيۋ- يوركتەگى كونسەرتى ءۇشىن 15 مىڭ ورىندىق زال الدىق

 نۇر- سۇلتان. قازاقپارات - مادەنيەت جانە سپورت ءمينيسترى ارىستانبەك مۇحامەدي ۇلى قازاقپارات تىلشىسىنە ءانشى ديماش قۇدايبەرگەننىڭ نيۋ- يوركتە وتەتىن شوۋ- كونتسەرتىنە قاتىستى مالىمەتتەرىمەن ءبولىستى.

«نيۋ- يورك قالاسىنداعى تانىمال «Madison Square Garden» سپورت كەشەنىندە ەكى زال بار. ونىڭ ءبىرى 5,5 مىڭ ورىندىق بولسا، ەكىنشىسى 15 مىڭ ورىندىق. ءبىز 23 قازانعا 5,5 مىڭ ورىندىق زالىن الىپ قويعان ەدىك. ءبىراق، قازىر جان- جاقتى تالداي وتىرىپ، 15 مىڭ ورىندىق الىپ، نە بولسا دا تاۋەكەلگە بارىپ وتىرمىز. ول زالدى الار بولساق، مەرزىمدى ناقتىلاۋ كەرەك بولادى. كونسەرتتىڭ قازان ايىندا بولاتىنى انىق! قاي زالدى الاتىنىمىز ايقىندالعان ۋاقىتتا بيلەت ساتىلىمى باستالادى. ول جەردە ەندى بيلەت باعاسى جوعارى بولادى» ، - دەدى مينيستر قازاقپارات تىلشىسىنە ەلوردادا «بالۋان شولاق» فيلمىنىڭ تۇساۋكەسەرىندە.

ەسكە سالا كەتسەك، بۇعان دەيىن وسى جىلدىڭ كۇزىندە نيۋ- يوركتەگى ايگىلى «Madison Square Garden» الاڭىندا ءانشى ديماش قۇدايبەرگەننىڭ شوۋ- كونتسەرتى وتەتىنىن حابارلاعان بولاتىنبىز.

«مادەنيەت جانە سپورت مينيسترلىگى 2019 -جىلدىڭ III توقسانىندا نيۋ- يوركتە الەمگە ايگىلى «Madison Square Garden» الاڭىندا ديماش قۇدايبەرگەننىڭ ايرىقشا شوۋ- كونتسەرتىن وتكىزبەك. بۇگىنگى تاڭدا اتالعان شوۋدى ۇيىمداستىرۋ جۇمىستارى باستالىپ كەتتى» ، - دەگەن ەدى قازاقپارات تىلشىسىنە بەرگەن سۇحباتىندا مينيستر.