اۋەسقوي بالىقشىلار جايىق جاعالاۋىنان 15 توننا قوقىس جينادى
وڭىرلىك كوممۋنيكاتسيالار قىزمەتىنىڭ حابارلاۋىنشا، 11 - تامىزدا وتكەن «Balyqshy Atyrau 1» اۋەسقوي بالىقشىلار كلۋبى ۇيىمداستىرعان اكتسيا نەگىزىنەن حالىقتىڭ ەكولوگيالىق ءتارتىبىن ساقتاۋعا جانە سۋدىڭ لاستانباۋىنا، سونداي- اق، دەمالىس ماۋسىمى كەزىندە جاعالاۋ ايماعىن جاقسارتۋعا باعىتتالعان.
كلۋبتىڭ قاتىسۋشىلارى جينالعان قوقىستىڭ باسىم كوپشىلىگى پلاستيكالىق جانە شىنى بوتەلكەلەردەن، پوليەتيلەندى پاكەت جانە 90- جىلداردان قالىپ كەتكەن قوقىستان تۇراتىنىن ايتادى. سونىمەن قاتار، «سپەتساۆتوبازا» ج ش س- نىڭ ەكى جۇك كولىگى جانە تيەگىش ماشيناسى جينالعان قوقىستى ارنايى پوليگوعا جەتكىزدى.
ۇيىمداستىرۋشىلار وسىنداي شارانى ءداستۇرلى تۇردە وتكىزۋگە نيەتتى.
«بۇل - ەرىكتى باستاما. كوپتەگەن ادامدار قورشاعان ورتانى تازا ۇستاۋعا دايىن. ءبىزدىڭ ماقساتىمىز - تابيعاتىمىزدى ساقتاۋدىڭ قانشالىقتى ماڭىزدى ەكەنىن كورسەتۋ. كەلەسى دەمالىس كۇندەرى ءبىز «جيلگورودوك» ىقشاماۋدانىنان «بالىقشى» ىقشاماۋدانىنا دەيىنگى جاعالاۋ ماڭىن تازالايتىن بولامىز. بارشا قاتىسامىن دەيتىن جانداردى قاتارىمىزعا قوسامىز. ۋاقىت وتە كەلە ءبىز جاعالاۋدى قالدىقتاردان تولىق ارىلتامىز» ، - دەيدى «Balyqshy Atyrau 1» اۋەسقوي بالىقشىلار كلۋبىنىڭ ۇيىمداستىرۋشىسى التىنبەك پشەنبايەۆ.
ايتا كەتەيىك، «Balyqshy Atyrau 1» اۋەسقوي بالىقشىلار كلۋبىندا قازىر شامامەن 170 ادام بار. بۇعان دەيىن، كلۋب مۇشەلەرى تەڭدىك جانە جۇمىسكەر اۋىلدارىندا تازالىق جۇمىستارىن جۇرگىزگەن بولاتىن.
