الماتىدا ەكى جاعالاۋ مەن 15 كوشە جاڭارادى
دەپ حابارلايدى قازاقپارات ءتىلشىسى.
«باسقارما 15 كوشە مەن ەكى جاعالاۋدى قايتا جوندەۋ تۋرالى جوبالىق- سمەتالىق قۇجات دايىنداعان. ولارعا رايىمبەك باتىر داڭعىلى - ەسەنتاي وزەنىنىڭ جاعالاۋى - اباي داڭعىلى - دوستىق داڭعىلى شارشى اۋماعى كىرەدى»، - دەدى الماتى قالاسى ساۋلەت جانە قالا قۇرىلىسى باسقارماسى باستىعىنىڭ ورىنباسارى الماسحان احمەدجانوۆ.
«ادامدارعا ىڭعايلى قالا» كونسەپتسياسى اياسىندا بيىل ماۋسىم ايىنان باستاپ قالا ورتالىعىنداعى ءبىرقاتار داڭعىلدار مەن كوشەلەر جاڭا كەلبەتكە يە بولادى. بۇل تىزىمدە اباي، ابىلاي حان، دوستىق، نازاربايەۆ، جەلتوقسان كوشەلەرى بار. بۇل اۋدانداردا جاياۋ جۇرگىنشىلەر اۋماعى كەڭەيتىلىپ، سۋبۇرقاقتار پايدا بولماق. سونداي- اق، بالالار الاڭى مەن سكۆەرلەر بوي كوتەرەدى.
«بيىل ءبىرىنشى كەزەڭدە وسى 5 كوشەنى قولعا الامىز. قالعانىن كەلەسى جىلعا جوسپارلاپ وتىرمىز. بارلىعى بيۋدجەتتىك قارجىلاندىرۋعا بايلانىستى. جوندەۋ جۇمىستارىن كەزەڭ كەزەڭىمەن جۇزەگە اسىرامىز. بۇل كوشەلەردەن باستاعان سەبەبىمىز - مۇنداعى تروتۋارلارعا تۇرعىنداردىڭ كوڭىلى تولمايدى. تروتۋار قۇرىلىسى بيىل اياقتالادى. قالعان جۇمىستار ورتالىق كوشەلەردى جانداندىرۋ ماقساتىندا جۇرگىزىلەدى. ماسەلەن، پليتالار توسەلىپ، اسفالت جاڭارتىلادى»، - دەيدى ول.
باسقارمانىڭ مالىمەتىنشە، الماتىنىڭ ديزاين- كودى جاسالۋ ۇستىندە. 2019 -جىلى اياقتالاتىن جوبادا قالا عيماراتتارىنىڭ جانە كوشە جابىندارى، شامدار مەن ماڭدايشالاردىڭ ءتۇر- ءتۇسى جازىلادى.
اۆتور: ارايلىم جولداسباي
