استانادا ساكەن سەيفۋلليننىڭ 15 مەترلىك پورترەتى سالىندى

استانا. قازاقپارات - استانالىقتاردىڭ كوبىسى جاڭا ۇلگىدە سالىنعان پورترەتتىڭ ءمان-ماعىناسىن تۇسىنبەيدى.

ال ۇلكەن كىسىلەر ءاپ-ادەمى سۋرەتتى «ءبۇلدىرىپ تاستاعانى» ءۇشىن سۋرەتشىلەرمەن سوزگە كەلىپ قالاتىن كورىنەدى، دەپ حابارلايدى قازاقپارات ءتىلشىسى.

«ءيا، كەيبىر كىسىلەر ۇرىسىپ كەتەدى. ءبىزدى ۆاندال دەپ ويلايدى. ويتكەنى ءبىز باس كەزىندە ساكەن سەيفۋلليننىڭ كادىمگىدەي پورترەتىن سالىپ شىقتىق. ەندى، ۇستىنەن نۇكتەلەردى سالىپ جاتىرمىز. سودان ۇلكەن كىسىلەر پورترەتتى «ءبۇلدىرىپ جاتىر» دەپ ويلايدى. نەگىزى، بۇل دا سۋرەت سالۋدىڭ ءبىر ءستيلى. ونى «نەوپوينتيليستىك ستيل» دەپ اتاۋعا بولادى. وندايدا مىڭداعان نۇكتەلەردەن ءبىر سۋرەت شىعادى. بۇل دەگەنىمىز، ءاربىر ادام تاريحتىڭ ءبىر بولشەگى ىسپەتتەس. ال ءبارىن قوسقاندا تۇتاس ءبىر تاريح، تۇتاس ءبىر پورترەت، حالىقتىڭ ۇلتتىق كودى شىعادى»، - دەيدى سۋرەتشى ستەپان كراسنوۆ.

ونىڭ ايتۋىنشا، جاقىن جەردەن ساكەن سەيفۋلليننىڭ پورترەتى انىق كورىنبەۋى مۇمكىن. الايدا الىستان تاماشا كارتينا بولىپ شىعادى.

«وسى پورترەتتى سالۋعا بەس كۇندەي كەتەتىن شىعار. ءبىز الدىمەن ەسكيزىن جاسادىق. ودان كەيىن مىنا جاقتا كوميسسيا قارادى. سوسىن حالىق داۋىس بەردى. ءسويتىپ، وسى سۋرەتتى تاڭدادى. ءبىر- ەكى كۇندە اياقتاپ قالامىز. پورترەت تولىعىمەن نۇكتەلەرمەن بويالادى»، - دەدى س. كراسنوۆ قازاقپارات تىلشىسىنە بەرگەن سۇحباتىندا.

ستەپاننىڭ ءوزى ماسكەۋدەن كەلدى. ودان بولەك، استانادا تاتارستاننىڭ، ءتىپتى فرانتسيا مەن يتاليانىڭ سۋرەتشىلەرى ۇيلەردىڭ قابىرعالارىنا ءوز تۋىندىلارىن سالۋدا.

 

ماسەلەن، ساكەن سەيفۋللين كوشەسىنىڭ باس جاعىندا بارىستىڭ ادەمى سۋرەتىن سالىپ قويدى. باس كەزىندە قابىرعانى تولىعىمەن كوك تۇسكە بوياپ تاستاعاندا جەرگىلىكتى تۇرعىندار تۇسىنبەي قالعان. بايبالام سالىپ، شاعىم تۇسىرگەندەر دە بولىپتى. الايدا قازىر بارلىعى ءدان ريزا.

ال ءىلياس ەسەنبەرلين كوشەسىنىڭ بويىندا تۇرعان ءۇيدىڭ قابىرعاسىنا قازاق قىزىنىڭ سۋرەتىن سالدى. «ول جەر- جاھاننىڭ تاريحىن جازىپ وتىر»، - دەيدى اۆتورلار. جالپى، بۇگىندە وسى ىسپەتتى ونەرگە سۇرانىس جوعارى. ماسەلەن، كۇنى كەشە عانا استاناداعى ءبىر ءۇيدىڭ قابىرعاسىنا سۋرەت سالعان جىگىت بۇگىن پورتۋگاليادا ءجۇر. ول جاقتان دا ماڭىزدى ءبىر تاپسىرىس تۇسكەن كورىنەدى.

ايتا كەتەيىك، ەلوردادا ASTANA Street Art فەستيۆالى وتۋدە. سونىڭ اياسىندا قازاقستاندىق جانە شەتەلدىك سۋرەتشىلەر ۇيلەردىڭ قابىرعالارىنا ءوز تۋىندىلارىن سالىپ ءجۇر.