مۇنداي باقىتتىڭ كەرەگى جوق: ەڭ قىسقا نەكە 15 مينۋتقا سوزىلدى
بۇل تۋرالى Oddity Central حابارلادى، دەپ جازادى Stan.kz اقپاراتتىق اگەنتتىگى.
مۇمكىن، كوپشىلىگى ەر ادامدى ايەلىمەن ءدال وسىلاي تەز اجىراسۋعا نە يتەرمەلەدى، دەپ قىزىعۋشىلىق تانىتىپ وتىرعان شىعار. ونىڭ جاۋابى قاراپايىم. جاس جىگىت سۇيىكتىسىمەن اقشاعا بولا، ياعني قالىڭدىقتىڭ اكەسىنە تولەۋگە كەلىسكەن قالىڭمالعا بولا اجىراسقان. جاس جىگىت پەن قالىڭدىقتىڭ اكەسى توي الدىندا نەكە كەلىسىمشارتىنا قول قويعان. وعان سايكەس كۇيەۋ جىگىت سۇيىكتىسىنىڭ اكەسىنە 30 مىڭ دوللارعا جۋىق اقشا بەرۋى كەرەك بولاتىن. ولار كۇيەۋ جىگىتتىڭ اقشانى ءبولىپ تولەيتىنىنە كەلىسكەن ەكەن. ياعني، جاس جىگىت جارتىسىن كەلىسىمشارتقا قول قويىلعاننان كەيىن، ال قالعانىن نەكە قيىلعان سوڭ تولەۋى ءتيىس بولعان.
العاشىندا كۇيەۋ جىگىت قالىڭدىقتىڭ اكەسىنە اقشانىڭ جارتىسىن بەرىپ، ءوز ۋادەسىندە تۇردى. ءبىراق جاس جۇبايلار سوت عيماراتىنان شىققاننان كەيىن، قايىن اتاسىنا شۇعىل تۇردە قالعان اقشا كەرەك بولىپ قالىپتى. سودان ول اقشانىڭ جارتى بولىگىن العىسى كەلەتىنىن تىكەلەي قوناقتاردىڭ كوزىنشە ايتقان. قوناقتاردىڭ الدىندا قىزارىپ قالعان كۇيەۋ جىگىت وعان كولىكتەگى اقشانى الىپ كەلۋ ءۇشىن بەس مينۋت ۋاقىت بەرۋىن سۇراعان.
ءبىراق اشكوزدىك قايىن اتاسىنىڭ ساناسىن جاۋلاپ العان كورىنەدى. ول كۇيەۋ بالاسىنا دوستارىنىڭ ءبىرىن تەزىرەك اقشاعا جىبەرۋىن تالاپ ەتكەن. ال، ەرلەردىڭ بۇل قاقتىعىسى ءدال قوناقتار مەن تۋىستارىنىڭ كوز الدىندا بولعان. وسىنداي جاعدايدان كەيىن، كۇيەۋ جىگىت ءوزىن «قورلانعانداي» سەزىنگەن.
ناتيجەسىندە، كۇيەۋ جىگىت ايەلىمەن بىرگە سوت زالىنا قايتا ورالىپ، نەكەنىڭ قيىلعانىنا 15 مينۋت وتپەي جاتىپ، اجىراسۋ تۋرالى ءوتىنىش بىلدىرگەن. وسىدان كەيىن، جىگىت قالىڭدىقتىڭ اكەسىنە ونىڭ قىزىن ايەلى رەتىندە كورگىسى كەلمەيتىنىن ايتقان. وسىلايشا، ءبىر ادامنىڭ اشكوزدىگى جاڭادان قۇرىلعان وتباسىنىڭ شاڭىراعىن شايقالتتى.
