كۇيەۋىنەن كەك الماق بولعان كەلىنشەك 15 جاننىڭ اجالىنا سەبەپ بولدى

 وتكەن بەيسەنبىدە پەندجاب پروۆينتسياسىندا ورىن العان قايعىلى وقيعا باسپا ءسوز بەتىنە ەندى جاريالانىپ وتىرعانعا ۇقسايدى.

قازىرگى كەزدە ءتارتىپ ساقشىلارىنىڭ قاماۋىندا وتىرعان اسيا بيبي ەسىمدى كەلىنشەكتىڭ مۇنداي قادامعا بارۋىنا ونىڭ ءبىر كەزدەگى عاشىعى كومەكتەسكەن كورىنەدى. اڭگىمە تارقاتىپ ايتار بولساق، اسيا ءبيبيدى ونىڭ كەلىسىمىنسىز كۇيەۋگە جىبەرگەن ەكەن. جۇرەك قالاۋىنسىز تۇرمىس قۇرعان كەلىنشەك ۇيلەنۋ تويى وتە سالىسىمەن ۇيدەن قاشىپ كەتۋگە ارەكەتتەنگەن. الايدا، ويلاعان جوسپارى ورىندالماي قالىپ، كوپ كەشىكپەي ونى ۇيىنە كۇشتەپ قايتارىپ اكەلەدى. وسى كەزدە اسيا مەن ونىڭ بۇرىنعى عاشىعى كەك الۋدىڭ جاڭا جوسپارىن ويلاستىرا باستايدى.

كۇيەۋىنىڭ كوزىن قۇرتسا، ەرىكسىز كەلىن بولىپ تۇسكەن ۇيدە ەشتەڭە ۇستاپ تۇرا الماسىن ەسەپتەگەن اسيا بيبي سۇتكە ۋ قوسىپ، زورلىقپەن العان جۇبايىنان قۇتىلۋعا كىرىسەدى. الايدا، كۇيەۋىنە دەپ ۋلاپ قويعان سۇتتەن ەنەسىنىڭ تاعام دايىندايتىنىن اسيا بيبي مۇلدەم بىلمەگەن بولاتىن.

 ناتيجەسىندە ۇلكەن اۋلەتتىڭ 27 مۇشەسى باس قوسقان كەشكى داستارحان باسىندا 15 ادام ۋلانىپ، بۇل ومىرمەن قوش ايتىسقان. قالعاندارىنىڭ دا جاعدايى ءماز ەمەس، تۇگەلدەي اۋرۋحاناعا جاتقىزىلعان.

Muslim.kz