قازاق ءتىلىنىڭ 15 تومدىق تۇسىندىرمە سوزدىگى دىبىستالادى

Voice to text - اۋىزشا ايتىلعان ءسوزدى ءماتىن مەن دىبىس تۇرىندە اۋدارۋعا مۇمكىندىك بەرەتىن، دىبىستى تانۋ جۇيەسى ارقىلى جۇزەگە اسىرىلاتىن تەحنولوگيا. وسى رەتتە ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى جاڭادان قولعا الىنعان جۇيە بويىنشا الدا اتقارىلاتىن جۇمىستارعا توقتالدى.
«قازاق ءتىلىنىڭ 15 تومدىق تۇسىندىرمە سوزدىگى بار. وسى سوزدىكتەگى بارلىق ءسوز تىركەستەرى مەن سوزدەر قازاق تىلىندە دىبىستالۋى كەرەك. بۇل جۇمىسقا Beeline كومپانياسى 4 ميلليون تەڭگە ءبولىپ وتىر. كەيىن دىبىستالعان فايلداردىڭ بارلىعى ساپالى تۇردە وڭدەلىپ، Google كومپانياسىنا جىبەرىلەدى. ولار ءبىز جىبەرگەن ماتەريالداردى قايتادان وڭدەپ، جۇيەگە ەنگىزەدى. ودان كەيىن بىرتىندەپ اۋدارما نۇسقاسىن بەرەدى. ول نۇسقالاردى ءبىز باعالاپ بولعاننان كەيىن اتالعان جوبا ىسكە قوسىلادى. وسى جۇمىستىڭ بارلىعىنا شامامەن ەكى جىل ۋاقىت كەتەدى دەپ جوسپارلاپ وتىرمىز»، - دەدى راۋان كەنجەحان ۇلى.
كونفەرەنسيا بارىسىندا Beeline قازاقستان كومپانياسىنىڭ كورپوراتيۆتىك كوممۋنيكاتسيا ديرەكتورى الەكسەي بەندز Google كومپانياسى اتالعان جوباعا جان- جاقتى كومەك كورسەتىپ، قازاقستاندىق تاراپتان جاسالعان ۇسىنىستى بىردەن قولداعانىن اتاپ ءوتتى. «ارينە، ولار ءبىزدى بىردەن قولداي كەتكەن جوق. جاسىراتىن ەشتەڭە جوق دەپ ويلايمىن. بىرىنشىدەن، قازاقستاندا حالىق سانى از. ياعني، جاھاندىق كومپانيا ءۇشىن قىزىعۋشىلىق تۋدىرماعانىمىز بەلگىلى. ءبىراق ولار بىزگە قۇرال بەرىپ، كراۋدسورسينگ ارقىلى وزدەرىڭىزگە كومەكتەسە الاتىن ادامدار تاۋىپ، ىستەپ كورىڭىزدەر دەدى. قولىمىزدان كەلسە، ءبىزدى قابىلدايتىندارىن ايتتى. ءبىراق، الداعى بىرنەشە اپتادا قازاق تىلىنە مىڭداعان ءسوز ەنگىزىپ، ءبىر جىلداعى جۇمىس ناتيجەسىندە قازاق ءتىلى Google Translate جۇيەسىنە قوسىلعان بولاتىن»، دەدى الەكسەي بەندز.
ونىڭ ايتۋىنشا، اۋىزشا اۋدارما قىزمەتىنىڭ ماڭىزى زور. «قازاق تىلىنەن باسقا Google Translate جۇيەسىنە 14 ءتىل ەنگىزىلگەن. وعان ءبىزدىڭ تاجىريبەمىزدىڭ اسەر ەتكەنى ءبىز ءۇشىن زور ماقتانىش»، دەيدى ا. بەندز.
ەستەرىڭىزگە سالا كەتسەك، Google Translate جۇيەسىندە بۇگىنگى تاڭدا 103 ءتىل بار. ونى كۇنىنە الەم بويىنشا 200 ميلليون ادام قولدانادى. ال اۋىزشا اۋدارۋ قىزمەتى 32 تىلدە قىزمەت ەتەدى.
"ەگەمەن قازاقستان"