20:30, 15 - ماۋسىم 2017 | GMT +5
استانادا بەلبەۋ كۇرەسىنەن 15- الەم چەمپيوناتى وتەدى
استانا. قازاقپارات - استانادا ءوتىپ جاتقان حالىقارالىق «ەكسپو-2017» كورمەسى اياسىندا 21-24- شىلدە ارالىعىندا «داۋلەت» سپورت كەشەنىندە بەلبەۋ كۇرەسىنەن ەرەسەكتەر اراسىندا XV الەم چەمپيوناتى وتەدى، دەپ حابارلايدى قازاقپارات ءتىلشىسى.
الەمدىك دوداعا 42 مەملەكەتتەن 300 گە جۋىق سپورتشى قاتىسادى دەپ كۇتىلۋدە. بۇل سىندا ەرلەر 16، ال ايەلدەر 6 سالماق دارەجەسى بويىنشا ءوزارا كىم مىقتىنى انىقتايدى.
ەرلەر اراسىنداعى مەدالدار جيىنتىعى ەركىن جانە كلاسسيكالىق تاسىلدە ساراپقا سالىنسا، ايەلدەر اراسىندا تەك ەركىن تاسىلدە جۇلدەلەر ساراپقا سالىنادى.
بەلبەۋ كۇرەسى - بەلى بايلانعان ەكى جاۋىنگەردىڭ ءوزارا جەكپە-جەگىن كورسەتەتىن ەجەلگى كۇرەس ءتۇرى. سپورتشىلار جەكپە-جەك كەزىندە ءبىر-ءبىرىن بەلبەۋدەن ۇستاپ، بەلدەسەدى جانە ءارقايسىسى ءوز قارسىلاسىن جىعۋعا جانە جەڭۋگە تىرىسادى.
اۆتور: كۇنسۇلتان وتارباي
