ديماش قۇدايبەرگەننىڭ تويداعى قالاماقىسى 15 مىڭ دوللار بولىپ كەتتى
ەرەكشە داۋىستى قازاق بالاسىنىڭ تالانتىن الەمگە ايگىلى دجەكي چان، لارا فابيان سىندى تۇلعالاردىڭ وزدەرى مويىندادى. ودان بولەك، بۇكىل الەمدە ديماشتىڭ تىڭدارماندارى پايدا بولدى. وسىنىڭ بارلىعى ونىڭ تويداعى سۇرانىسىنا اسەر ەتسە كەرەك-تى.
بۇل تۋرالى 31 -ارنانىڭ «ايتا بەرسىن» باعدارلاماسىندا ايتىلدى.
توي ورتالىعىنىڭ باسشىسى ءارى پروديۋسەرى جان مۇقانوۆ ديماشتىڭ قالاماقىسىنىڭ بۇرىنعىمەن سالىستىرعاندا ەسەلەپ ارتقاندىعىن ايتىپ بەردى.
«ديماش قۇدايبەرگەنوۆتىڭ بۇگىنگى قالاماقىسى 15 مىڭ دوللار. وسىدان ءبىر اي بۇرىن عانا ونىڭ قالاماقاسى نەبارى 2 مىڭ دوللار بولاتىن. «مۋزارت» مايرا مۇحامەد قىزى سىندى ارتىستەردىڭ وزدەرى 10 مىڭ دوللار الادى»، - دەيدى ول.
بايقاۋ 14 كەزەڭگە جالعاساتىندىقتان ديماشتى تويعا شاقىرۋ ازىرگە قيىندىق تۋعىزۋدا. دەسە دە سۇرانىس كوپ دەيدى مۇقانوۆ.
«ديماشپەن ءبىراز قيىندىقتار بار. سەبەبى ول قاتىسىپ جاتقان جوبا 14 كەزەڭگە جالعاسادى، سول سەبەپتى ءبىز وعان ءتيىسىپ جاتقان جوقپىز. بايقاۋ اياقتالمايىنشا، بىردەڭە ايتۋ قيىن. ال نەگىزىندە وعان سۇرانىس جوعارى، ونىڭ قالاماقىسىن ناقتى ءبىلىپ وتىرعانىمىز دا سوندىقتان. ءبىر جاعىنان، ول قازىر بايقاۋدا بولعاندىقتان دا اقىسى تىم جوعارى. ديماشتىڭ چاڭشا قالاسىنان بەرى قاراي كەلۋدىڭ ءوزى قيىن. سوندىقتان دا نە سەبەپتى قالاماقىسى جوعارى ەكەنىن تۇسىنۋگە بولادى. جالپى جاقىن ارادى ونىڭ اقىسى 25 مىڭ دوللارعا دەيىن كوتەرىلسە دە تاڭعالمايمىن»، - دەيدى ول.
