بەلورۋسسيا 15 ميلليارد ا ق ش دوللارىن جوعالتتى - لۋكاشەنكو
بۇل تۋرالى بۇگىن بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو ءمالىم ەتتى، دەپ حابارلايدى ر ي ا نوۆوستي.
الدىندا ماسكەۋ مەن مينسك اراسىندا «قارا مىسىق» جۇگىرىپ وتكەنى بەلگىلى بولعان. ءتىپتى، ماسكەۋ ءبىرىنشى بولىپ اراداعى داۋ- دامايدىڭ شەتىن شىعارىپ جىبەرىپ ەدى.
«لۋكاشەنكو ەۋرازيالىق وداقتان شىققالى جاتىر، ماسكەۋ وعان توسقاۋىل بولماق ويى جوق» دەپ كەشە رەسەيلىك باسىلىمدار ماقالا جاريالادى.
ول ماقالا ىشىندە وداقتان كەتسەڭ، ەكىنشى ۋكراينانىڭ كۇيىن كەشەسىڭ دەگەن ماعىناداعى كرەملدىڭ دە مەڭزەۋ سوزدەر ايتىلدى.
قالاي دەگەنمەن دە «داۋدىڭ باسى دايرابايدىڭ كوك سيىرى» دەمەكشى، بۇل ارادا ەكى ەلدىڭ توڭ- تەرىس ەتكەن نەندەي جاعداي ەكەنى بۇگىن اقىرى جاريا بولدى.
بەلارۋس باتكاسى ورتاق ەكونوميكالىق وداق قۇرعان ماسكەۋ مينسكىنى جىندى قىلۋدا، ءبۇيتىپ مازاق ەتكەن وداعى قۇرىسىن دەپ قول سىلتەپ وتىرعان سەكىلدى...
«وسى ۋاقىتقا دەيىن اراداعى ساۋدا- ساتتىق شارتتارى مەن باعالاردىڭ بىردەي بولماۋىنان بەلارۋس 15 ميلليارد ا ق ش دوللارىن جوعالتتى. ولار وسىنشا پايدا تاپقاندارىن مويىنداپ وتىر. ەندى، مىنە، ولار بىزگە 5 ميلليارد نەسيە بەرىپ جاتىر. بىزدەن باعا ارقىلى 15 ميلليارد پايدا كورىپ، سوسىن بىزگە ءوزىمىزدىڭ اقشامىزدى، ونىڭ وزىندە ۇشتەن ءبىر بولىگىن حالىقارالىق ۆاليۋتا قورىنان جوعارى پايىزبەن قايتارعاندى جاقسى كورىپ وتىر، ايتاتىنى جوق»، - دەدى لۋكاشەنكو مينسكىدە وتكەن ۇلكەن باسپا ءسوز ءماسليحاتىندا.
بەلارۋس پرەزيدەنتى روسسەلحوزنادزور باسشىسى سەرگەي دانكۆەرتتىڭ ۇستىنەن قىلمىستىق ءىس قوزعاۋ كەرەك دەدى. ويتكەنى دانكۆەرت بەلارۋس ونىمدەرىنىڭ رەسەي نارىعىنا شىعۋىنا قاساقانا كەدەرگى كەلتىرىپ وتىر.
بۇدان بولەك لۋكاشەنكو رەسەيدى شەكارا ارالىق ايماقتاردى قالىپقا كەلتىرۋدەگى حالىقارالىق كەلىسىمشارتتى بۇزدى دەپ ايىپتادى.
سارسەنبى كۇنى رەسەيدىڭ قۇقىقتىق اقپاراتتىق رەسمي پورتالىندا رەسەيدىڭ فەدەرالدىق قاۋىپسىزدىك بيۋروسىنىڭ ءۇش قاۋلىسى جارىق كوردى. وندا بەلارۋس رەسپۋبليكاسى شەكاراسى ماڭىنداعى پسكوۆ، سمولەنسك جانە بريانسك وبىلىستارىندا شەكارالىق ايماق قۇرىلادى دەلىنگەن. بۇل قاۋلى 7-اقپاننان باستاپ ءوز كۇشىنە ەنبەك.
«حالىقارالىق كەلىسىم مەن كەلىسىمشارتتار بار. مىنە سونىڭ بارلىعىنا ءبىر مينيستر، ءتىپتى فسبەشنيك بولسىن، ءبىر قول قويۋ ارقىلى سونىڭ ءبارىن جوققا شىعارىپ وتىر. ءبىر مينيستر. بۇل دۇرىس پا، ءوزى؟..» ، - دەدى لۋكاشەنكو مينسكىدەگى باسپا ءسوز ءماسليحاتىندا.
قالاي دەگەنمەن دە وسىنداي قاتتى- قاتتى سوزدەردەن سوڭ لۋكاشەنكو ماسكەۋ مەن مينسكىنىڭ بارلىق داۋلى ماسەلەلەردى شەشىپ، ءوزارا كەلىسىمگە كەلە الاتىنىنا سەنىم ءبىلدىردى.
kaz.365info.kz
