قۋاندىق بيشىمبايەۆ كەمى 15 جىلعا سوتتالۋى مۇمكىن

استانا. قازاقپارات - «ءىرى كولەمدە پارا الدى» دەپ ۇستالعان قۋاندىق بيشىمبايەۆ 15 جىلعا سوتتالۋى مۇمكىن.
None
None

ءبىراق، بۇرىنعى ۇلتتىق ەكونوميكا ءمينيسترىنىڭ قانشا اقشا العانى ازىرگە قۇپيا ۇستالىپ وتىر. بۇل تۋرالى كتك حابارلايدى.

جەمقورلىققا قارسى ۇلتتىق بيۋرو بيشىمبايەۆ «بايتەرەك» حولدينگىن باسقارعان كەزدە، ونى مايشەلپەككە اينالدىرعان دەپ كۇدىكتەنەدى. تانىمال شەنەۋنىكتىڭ سىبايلاستارى دەلىنگەن «بايتەرەكتىڭ» ءبىرقاتار لاۋازىمدى توپ- مەنەدجەرلەرىنىڭ ەكى ايدان بەرى قاماۋدا وتىرعانىن دا ايتا كەتەيىك.

قۋاندىق بيشىمبايەۆتىڭ كوز ىلەسپەس جىلدامدىقپەن وسكەن ساياسي كارەراسىنا قىزىعىپ تا، قىزعانىپ تا قاراۋعا بولاتىن ەدى. 19 ىندا ۋنيۆەرسيتەت ءبىتىرىپ، امەريكادا «بولاشاقپەن» وقىپ، 3 جوعارعى وقۋ ورنىن ۇزدىك بىتىرگەن ۆۋندەركيندتتىڭ مەملەكەتتىك قىزمەتتەگى باس اينالدىرارلىق ەڭبەك جولى دا 21 جاسىندا-اق باستالىپ كەتكەن.

25 ىندە ءمينيستردىڭ كەڭەسشىسى، كەيىن «سامۇرىق- قازىنادا» ءتوراعانىڭ ورىنباسارى بولدى. «بايتەرەك» ۇلتتىق حولدينگىن دە 3 جىل باسقارعان. قاراشا ايىندا ءدال وسى حولدينگتىڭ ەنشىلەس كومپانياسى «بايتەرەك» DEVELOPMENT"  ءتوراعاسىنىڭ ورىنباسارى، ءماجىلىستىڭ ەكس- سپيكەرى قابيبوللا جاقىپوۆتىڭ ۇلى مەن بىرنەشە اتقارۋشى ديرەكتور 288 ميلليون تەڭگە پارامەن ۇستالعان ەدى. ارادا كوپ ۋاقىت وتپەي تەرگەۋشىلەر بۇل ىسكە قۋاندىق بيشىمبايەۆتىڭ دا قاتىسى بارىن انىقتاعان سياقتى. ءسويتىپ، ەكس- مينيسترگە قاتىستى قىلمىستىق ءىس قوزعالىپ، ءوزى يزولياتورعا جابىلدى.

جەر داۋىنان كەيىن ۇلتتىق ەكونوميكا مينيسترلىگىن بار- جوعى 8 ايداي باسقارعان ۇكىمەتتەگى ەڭ جاس شەنەۋنىكتىڭ جوسپارى كوپ بولاتىن. 36 جاستاعى قۋاندىق ءۋاليحان ۇلى يپوتەكانىڭ پايىزىن تومەندەتىپ، ارزان باسپانا تۇرعىزىپ، «نۇرلى جەر» باعدارلاماسى ارقىلى حالىققا 10 سوتىق جەر تاراتۋعا ۋادە ەتكەن.

قۋاندىق بيشىمبايەۆ: ازاماتتاردى جەر ۋچاسكەلەرىمەن ينفراسترۋكتۋراسى بار ۋچاسكەلەرمەن قامتاماسىز ەتۋ. بۇل ادامدارعا جەكە ۇيلەرىن سالۋعا بەرىلەدى.

الايدا، وسى تۇرعىن ءۇي سالۋعا بيۋدجەتتەن بولىنگەن قىرۋار قارجىنى تەندەردەن ۇتىپ بەرۋ ءۇشىن «بايتەرەك» حولدينگىنىڭ مەنەدجەرلەرى كاسىپكەرلەردەن جۇيەلى تۇردە پارا الىپ وتىرعان. مول اۋىزباستىرىقتىڭ ءبىر بولىگى - بيشىمبايەۆتىڭ دا قالتاسىن قامپايتقان سىڭايلى. ويتكەنى، جەمقورلىققا قارسى ۇلتتىق بيۋرو ماقتاۋلى مينيستر سىبايلاستارىمەن اۋىز جالاسىپ، ءىرى كولەمدە پارا العان دەپ وتىر. ميلليونداردى اتقامىنەر جەكە باسىنىڭ قاجەتىنە جاراتىپتى. ەندى يزولياتوردا تەرگەۋشىلەردىڭ اقشا تۋرالى سۇراقتارىنا جاۋاپ بەرىپ جاتقانى انىق.

قۋاندىق بيشىمبايەۆ: قانداي اقشا جايلى ايتىپ تۇرعانىڭىزدى بىلمەيمىن. بارلىق اقشا يگەرىلىپ جاتىر.

قازاقستانداعى ەڭ تابىستى شەنەۋنىك، اقشا ساناۋدان عانا ەمەس، ساكسافوندا ويناۋدان الدىنا جان سالمايتىن.

ەندى ءان مەن كۇيدىڭ ورنىنا ول، يزولياتوردا تەرگەۋ ماتەريالدارىن وقىپ، سوت پروتسەسىنە ازىرلەنەتىنى بەلگىلى. ەگەر قۋاندىق بيشىمبايەۆتىڭ كىناسى دالەلدەنسە، دۇنيە- مۇلكى تاركىلەنىپ 15 جىلعا دەيىن سوتتالۋى مۇمكىن. نەمەسە العان پاراسىنىڭ كولەمىنە قاراي ءىرى ايىپپۇلمەن قۇتىلۋى دا عاجاپ ەمەس. ءبىر انىعى شاتىلعان ەكس- ءمينيستردىڭ ساياسي كارەراسى تولىق اياقتالدى دەۋگە بولادى.

 

سوڭعى جاڭالىقتار