قازاق ادەبيەتىنىڭ جاھاندىق جارشىسىنا 15 جىل تولدى

الماتى. قازاقپارات ءال- فارابي اتىنداعى قازاق ۇلتتىق ۋنيۆەرسيتەتىندە ادەبيەتشىلەر مەن عالىمدار، ستۋدەنت جاستار «اباي» حالىقارالىق كلۋبى مەن «امانات» ادەبي جۋرنالىنىڭ 15 جىلدىعىن جانە اتالعان ادەبي كلۋب پەن باسىلىمنىڭ قۇرىلتايشىسى، جازۋشى روللان سەيسەمبايەۆتىڭ 70 جىلدىعىن اتاپ ءوتتى، دەپ حابارلايدى قازاقپارات.

جيىننىڭ اشىلۋىندا ءسوز العان ج و و رەكتورى عالىم مۇتانوۆ جازۋشىنى مەرەيلى جاسىمەن جانە ەلەۋلى ەڭبەكتەرىنىڭ 15 جىلدىعىمەن قۇتتىقتاپ، قاز ۇ ۋ عالىمدارى مەن ستۋدەنتتەرى اتىنان يىعىنا شاپان جاپتى.

قاز ۇ ۋ رەكتورى ءوز سوزىندە «اباي» حالىقارالىق كلۋبى مەن «امانات» جۋرنالىن «قازاقستاننىڭ ادەبي برەندى» دەپ اتادى.

«بۇگىندە قازاق جازۋشىسى روللان سەيسەبايەۆتىڭ كلۋبى قازىرگى زامان اۆتورلارى شىعارمالارى مەن الەم ادەبيەتى جاۋھارلارىنىڭ 200 تومىن قالىڭ وقىرمانعا جەتكىزىپ وتىر. بۇل وسكەلەڭ ۇرپاقتى تاربيەلەۋدەگى ەرەكشە ەڭبەك. «اباي» حالىقارالىق جۋرنالى مەن «امانات» جۋرنالى - قازاقستاننىڭ ادەبي برەندى»، دەدى ع. مۇتانوۆ.

جيىن باسىندا ءسوز العان قاز ۇ ۋ عالىمى ءو. ءابدىمانوۆ «تۇركىسوي» باس حاتشىسى دۇيسەن قاسەيىنوۆتىڭ قۇتتىقتاۋ حاتىن وقىپ بەردى.

جازۋشى شىعارماشالىعى تۋرالى باستى بايانداما جاساعان فيلولوگيا عىلىمدارىنىڭ دوكتورى اسىلان جاقسىلىقوۆ روللان سەيسەمبايەۆتىڭ «ءىبىلىس تاعى» رومانىنا جان- جاقتى تالداۋ جاسادى.

كونفەرەنسيا بارىسىندا «مەنىڭ 100 كىتابىم» جوباسىنىڭ تۇساۋى كەسىلىپ، كىتاپ كورمەسى ۇيىمداستىرىلدى.

انىقتاما:

روللان شاكەن ۇلى سەيسەنبايەۆ 1946 -جىلى 11 -قازاندا سەمەي قالاسىندا دۇنيەگە كەلگەن. سەمەي ينجەنەرلىك- تەحنولوگيالىق ينستيتۋتىن ءتامامداعان. جازۋشى، دراماتۋرگ، «اباي جانە 21-عاسىر» حالىقارالىق كلۋبىنىڭ پرەزيدەنتى، قازاقستان كومسومولى سىيلىعىنىڭ، ك س ر و جازۋشىلار وداعى سىيلىعىنىڭ لاۋرەاتى، كولۋمبيا ۋنيۆەرسيتەتى سىيلىعىنىڭ لاۋرەاتى، بۇكىلالەمدىك ونەر جانە مادەنيەت اكادەمياسىنىڭ اكادەميگى.

وبلىستىق كومسومول كوميتەتىندە قىزمەت ەتكەن. كەيىن م. گوركي اتىنداعى ادەبيەت ينستيتۋتى جانىنداعى ك س ر و جازۋشىلار وداعى باسقارماسىنىڭ قازاق ادەبيەتى جونىندەگى كەڭەسىنىڭ جاۋاپتى حاتشىسى بولعان.

العاشقى پوۆەسى 1975 -جىلى جارىق كورگەن. سودان بەرگى ۋاقىتتا «اڭساۋ»، «ءوزىمدى ىزدەپ ءجۇرمىن»، «ساعىنىپ جەتكەن جاز ەدى» پوۆەستەرى، «ءومىر سۇرگىڭ كەلسە ەگەر»،  «تاۋ باسىندا تۇيىسكەن جول»، «ءىبىلىس تاعى»، ت. ب. روماندارى جارىق كورگەن. «ءوزىمدى ىزدەپ ءجۇرمىن» پەساسى 1975 -جىلى جاس دراماتۋرگتەردىڭ بۇكىل وداقتىق بايقاۋىندا جۇلدەگە يە بولعان. ونىڭ پەسالارى رەسپۋبليكالىق تەاتر ساحنالارىندا قويىلىپ كەلەدى. جازۋشى ابايدىڭ قارا سوزدەرىن ورىس تىلىنە اۋدارۋعا اتسالىسىپ، انگليادا اباي ءۇيىن اشۋعا ءوز ۇلەسىن قوسقان. «قۇرمەت بەلگىسى» وردەنىمەن ماراپاتتالعان.

اۆتور: الماس مۇقاش ۇلى