قازاقستاندا سالافيزم اعىنىن ۇستانعانداردىڭ سانى 15 مىڭعا جۋىقتايدى - ع. شوكين
بۇگىن «ەكسپەرت» كلۋبىنىڭ وتىرىسىنا قاتىسقان ق ر مادەنيەت جانە سپورت مينيسترلىگى ءدىن ىستەرى كوميتەتىنىڭ ءتوراعاسى عالىم شويكين وسىلاي ءمالىم ەتتى.
«سالافيزم باعىتىنا كەتكەن ادامداردىڭ ناقتى سانىن شىعارۋ مۇمكىن ەمەس. ءبىراق، شامامەن ولاردىڭ سانى 15 مىڭعا جەتەدى. قازاقستاندا قانشا ادام وسى سالافيزم باعىتىنا كەتكەنىن ەشكىم دە ءدوپ باسىپ ايتا المايدى. قازىر قوعامدا ساراپشىلار وسى اعىمعا تىيىم سالۋ تۋرالى پىكىر ايتىپ جاتىر. قۇزىرلى ورگاندار بۇل ماسەلەنى جان جاقتى زەرتتەۋدە. ءبىراق، وسى باعىتقا كادىمگىدەي تىيىم سالساق، ونىڭ سالدارى قانداي بولادى دەگەن ماسەلەنى قاراۋ كەرەك. قازىر بۇل ماسەلەنى جان- جاقتى قاراۋ كەرەك ەكەنىن، سەبەبى، ەگەر ءبىز راديكالدى شارالار قابىلداساق، وندا ادەبيەتتى، اۋديو- بەينەجازبالارعا قاتىستى شەشىم قابىلداۋىمىز كەرەك. ياعني، ءبىر تىيىم سالۋمەن شەشىلەتىن ماسەلە ەمەس. 2014 -جىلدان بەرى «اقنيەت» وڭتايلاندىرۋ ورتالىعى ءداستۇرلى ەمەس ءدىني اعىمعا كەتكەن 300 ادامدى دۇرىس جولعا سالعان. ءبىراق، ولاردىڭ قايتىپ سول اعىمعا بارمايتىنىنا ەشكىم كەپىل بەرە المايدى. قازىر تەرىس اعىمعا كەتكەن 500 دەن استام ادام جازاسىن وتەپ جاتىر»، - دەپ حابارلادى عالىم شويكين.
ال، ق م د ب ءتوراعاسىنىڭ ورىنباسارى، نايب ءمۇفتي سەرىكباي قاجى وراز اللا ەلشىسى مۇحاممەد پايعامباردىڭ (س. ا. ۋ. ) مىنا ءبىر وسيەتىن ايتىپ بەردى.
«مۇحاممەد پايعامبارىمىز: «مەن ومىردەن وتكەننەن كەيىن سەندەر 73 ءتۇرلى اعىمعا بولىنەسىڭدەر» دەگەن ەكەن. «سونىڭ جەتپىس ەكىسى اداسىپ جۇرەدى دە، ءبىر عانا جول ءتۇزۋ جولمەن بارادى» دەپتى. سونا اللا ەلشىسىنەن «ولار كىمدەر» دەپ سۇراپتى. سوندا پايعامبارىمىز: «مەنىڭ سۇننەتىمدى تولىق ۇستانعاندار، مەن ايتىپ كەتكەن جولدى ۇستانىپ، كەيىنگى ۇرپاققا جەتكىزەتىندەر جانە سونىڭ جولىنا ەرگەندەر» دەگەن ەكەن. جالپى، بۇگىنگى تاڭدا، سالىستىرمالى تۇردە قاراساق، ول 73 ەمەس، 73 جولىنىڭ ىشىنەن دە قانشاما ءبولىنىپ شىققان جۇزدەگەن اعىمدار بولۋى مۇمكىن»، - دەدى بۇل ماسەلەنى تولىقتىرعان س. وراز.
اۆتور: كەنجەكەي توقتامۇرات قىزى
