قازاقستاندىقتار ۆيزاسىز ساياحاتتاي الاتىن الەمنىڭ ەڭ كەرەمەت 15 ەلى - فوتو

استانا. قازاقپارات - جازعى دەمالىس ۋاقىتى جاقىنداپ قالعاندىقتان، ۆيزا راسىمدەلۋىنە ۋاقىتى مەن اقشاسىن شىعىنداۋدى قالامايتىن قازاقستاندىقتارعا ارناپ الەمنىڭ ەڭ كەرەمەت ەلدەرىن ۇسىنامىز.

وتانداستارىمىز ۆيزاسىز ساياحاتتاي الاتىن ەڭ تانىمال مەملەكەتتەر الدىندا رەسەي، قىرعىزستان، تۇركيا ەلدەرى ورىن العان. الايدا جازعى دەمالىسىڭىزدى عۇمىر بويى ەستە قالارلىقتاي وتكىزۋگە بولاتىن ەلدەر قاتارى اتالعاندارمەن شەكتەلمەيدى.

1. ارمەنيا

ارمەنيا - اسقار تاۋلى، نۋ ورماندى، ورىكتەر مەن ەڭ ءدامدى كاۋاپتىڭ ءدامىن تاتىپ كورە الاتىن ناعىز قوناقجاي مەملەكەت. وعان قوسا، كونە موناستىرلارعا باي. مەملەكەتتىڭ تۋريستەر ءجيى باراتىن كورىكتى جەرلەرى - تاتيەۆ، نوراۆانك، اگارتسين، گەگارد.

ساياحاتتاۋ مەرزىمى - 90 كۇنگە دەيىن

2. ءازىربايجان

گۋبا اۋدانىنىڭ گالاحۋدات جانە حىنالىگ اۋىلدارى مەملەكەت بويىنشا حالىق ەڭ تىعىز ورنالاسقان جەرلەر بولىپ تابىلادى. اتالعان اۋىلدار 2400-2500 مەتر بيىكتىكتە ورنالاسقان. ونداعى مادەنيەت تە، تۇرعىندار دا - وزگە وڭىرلەردەگى ءازىربايجاندارعا قاراعاندا ەرەكشە. تاريحى مەن تابيعاتى سىرعا تولى شەكي، گابالا، يسمايللى جانە گۋسار قالالارىندا ساياحاتتاعانىڭىزعا ەش وكىنبەسىڭىز انىق.

ساياحاتتاۋ مەرزىمى -  90 كۇنگە دەيىن

3. كولۋمبيا

كولۋمبيا - تابيعاتى كوركەم، كونە ءۇندى قالالارى مەن جاعالاۋلارىنا، شيپاجايعا تولى مەملەكەت. ادەمىلىگى بويىنشا بوگوتا مەن سانتا-مارتادان كەم تۇسپەيتىن عاجايىپ كارتاحەنا قالاسى ەستەن كەتپەس اسەر سىيلايدى.

ساياحاتتاۋ مەرزىمى - 90 كۇنگە دەيىن

4. كورەيا رەسپۋبليكاسى

وڭتۇستىك كورەيا مەملەكەتى شيپالى مينەرالدى قاينار بۇلاقتارى، قۇمدى جاعاجايلارى، باعزى زامانداردان سىر شەرتەتىن ەسكەركىشتەرى، تاۋ شاڭعى شيپاجايلارىمەن تانىمالدىققا يە. زاماناۋي سەۋل، ءتۇرلى بوياۋلى ينچحون، چەدجۋدو شيپاجاي ارالدارىنىڭ كوز تارتار سۇلۋلىعى مەن ەرەكشەلىگىن سوزبەن ايتىپ جەتكىزگىسىز.

ساياحاتتاۋ مەرزىمى - 30 كۇنگە دەيىن

5. ۋكراينا

ۋكراينا مەملەكەتى قارا تەڭىز جاعاجايلارى جانە كارپات تاۋ شاڭعى شيپاجايىمەن قۇشاق جايا قارسى الادى. مۇندا پولتاۆا، زاپوروجە، كيەۆ قالالارىنا ەكسكۋرسيالىق ساياحات جاساپ، ترۋسكاۆتسەدە ەم الىپ، شيپاجايلاردا دەمالۋىڭىزعا بولادى.

ساياحاتتاۋ مەرزىمى - 90 كۇنگە دەيىن

6. مالايزيا

مالايزيا - قۇرلىقتىق جانە ارالدىق مادەنيەت قاتار كورىنىس تاباتىن قوس مادەنيەتتى ەل. عيماراتتارى اسپانمەن تىلدەسكەن ەل استاناسى كۋالا-لۋمپۋر كاليمانتانا جاعاجايلارىمەن كورشىلەس جاتىر. ال ءداستۇرلى بازارلار مەن زاماناۋي دۇكەندەردە تۋريستەر لەگى ۇزىلگەن ەمەس.

ساياحاتاۋ مەرزىمى - 30 كۇنگە دەيىن

7. موڭعوليا

موڭعوليا - بۇل ۇلان-عايىر دالا مەن ءموپ-ءمولدىر كولدەر، قار باسقان التاي شىڭدارى مەن گوبي ءشولى، بۋدديزم ءدىنىنىڭ تاڭعاجايىپ ەسكەرتكىشتەرى مەن جان بىتكەن شىڭعىس حان تاريحى. مۇندا ساياحاتتاۋشىلار جارقىن فەستيۆالداردىڭ كۋاسى بولىپ، قوناقجاي ەلدىڭ باي داستارحانىنان ءدام تاتا الادى.

ساياحاتتاۋ مەرزىمى - 90 كۇنگە دەيىن

8. سەيشەل ارالدارى

سەيشەل ارالدارى - جاس جۇبايلار ءجيى ساياحاتتايتىن عالامات جەر. ءۇندى مۇحيتىنىڭ جۇرەگىندە ورنالاسقان جۇماق مەكەندە كەرەمەت 115 ارال بار. ولاردىڭ 30 ىندا عانا ادامدار مەكەن ەتەدى. بۇل جەردەگى اق قۇمدى، كەڭ القاپتى، وڭاشا شيپاجاي تۇرلەرىنىڭ مولدىعى تاڭداۋىڭىزعا ەرىك بەرەدى.

ساياحاتتاۋ مەرزىمى - 14 كۇنگە دەيىن

9. يندونەزيا

ۇمىتىلماس يندونەزيا - ەكزوتيكانىڭ وزەگى ىسپەتتى: باليدىڭ العاشقى قالپىن ساقتاعان تابيعاتى مەن سۋماترا ارالدارىنىڭ قارا قۇمدى جاعاجايلارى، ياۆا سارايلارى مەن كاليمانتان ارالىنىڭ جاۋىندى ورماندارى. بۇل ەلدە جاعاجايلاردا بەلسەندى دەمالىس وتكىزىپ، سەرفينگ ءمىنىپ، ەكسۋرسيالىق ساياحات جاساي الاسىز.

ساياحاتتاۋ مەرزىمى - 30 كۇنگە دەيىن

10. فيليپپيندەر

وزىندىك تۋريستىك ەرەكشەلىككە يە 7107 ارالدىڭ قايسىندا بولماسىن ءبي كەشتەرى مەن كلۋبتاردا ساۋىق-سايران قۇرىپ، تابيعات اياسىندا وڭاشا قالۋىڭىزعا جاعداي جاسالعان. تاماشا اۋا رايى، تاڭعالارلىق وسىمدىكتەر مەن جانۋارلار الەمى، كەرەمەت جاعاجايلار - مۇنىڭ بارلىعى فيليپپيندەرگە تيەسىلى.

ساياحاتتاۋ مەرزىمى - 30 كۇنگە دەيىن

11. گرۋزيا

گرۋزيا قارا تەڭىز جاعاجايلارى، تاۋ شاڭعى شيپاجايلارى، ءجۇزىم باقتارى، كوز تارتار جەرلەرى جانە ايرىقشا اسحاناسىمەن قۋانتادى. قوناقجاي، ەت-جۇرەگىڭدى باۋراپ، جىلۋ سىيلايتىن گرۋزيادا ەسكى قامالدار، عيماداتحانالار، شيپاجايلار بارشىلىق.

ساياحاتتاۋ مەرزىمى - 90 كۇنگە دەيىن

12. ارگەنتينا

تانگو ءبيىنىڭ وتانىندا تەڭىز جانە تاۋ شاڭعى شيپاجايلارى بار. قىزىعى مول سالتا، كوردوبا، ەل-كالافاتە، ۋشۋايا قالالارى ساياحاتشىلار كەۋدەسىندە ەستەن كەتپەس اسەر قالدىرادى.

ساياحاتتاۋ مەرزىمى - 30 كۇنگە دەيىن

13. وزبەكستان

وزبەكستان - ۇلى جىبەك جولىنىڭ قازىناسىنا باي مەملەكەت. سامارقاندتاعى مەشىتتەر، بۇحاراداعى كەرۋەن- سارايلار، كونە حيۋا مەن زاماناۋي تاشكەنتتى مەملەكەت ماقتانىشى دەۋگە بولادى.

ساياحاتتاۋ مەرزىمى - 90 كۇنگە دەيىن

14. شياڭگاڭ

قىتايدىڭ ارنايى اكىمشىلىك اۋدانى شياڭگاڭ - قارجىلىق، ساياسي جانە تۋريستىك ورتالىق. سانسىز ءزاۋلىم عيماراتتار مەن ساۋدا ورتالىقتارىنان بولەك، بۇل جەردە تاماشا جاعاجايلار دا بار. شياڭگاڭدا «ديسنەيلەندتە»، جۇلدىزدار اللەياسىندا، زوولوگيالىق جانە بوتانيكالىق باقتاردا ساياحاتتاپ، دەلفيندەر شوۋىن تاماشالاي الاسىز.

ساياحاتتاۋ مەرزىمى - 14 كۇنگە دەيىن

15. مولداۆيا

مولداۆيانىڭ اۋماعى شاعىن عانا. الايدا مۇندا قىزىققا تولى مەكەندەر از ەمەس: مەملەكەتتىڭ فلورەشت جانە ورگەيەۆ اۋداندارىنداعى رەۋت وزەنىنىڭ ارناسى، تاماشا تابيعاتتى ەدينەتس، بريچان، رىشكان، گلوديان اۋداندارى بار. جولىڭىز ءتۇسىپ، مولدوۆياعا بارا قالساڭىز، مىندەتتى تۇردە كيشينيەۆ پەن تيراسپولدە ساياحاتتاعانىڭىز ءجون.

ساياحاتتاۋ مەرزىمى - 90 كۇنگە دەيىن

قازاقستاندىقتار بەلارۋس، تاجىكستان مەملەكەتتەرىندە دە ۆيزاسىز ساياحاتتاۋ مۇمكىندىگىنە يە ەكەنىن اتاپ وتەمىز. قىتايلىق حاينان ارالىندا ۆيزاسىز 2 اپتا بويى كۇنگە قىزدىرىنىپ، جازدىڭ راحاتىن سەزىنە الاسىز. تۋريستەر اراسىندا تانىمال تايلاند، ۆەتنام، لاوس، شري- لانكا، نەپال، ماكاو، يوردانيا مەملەكەتتەرىنە ساياحاتقا اتتانۋ ءۇشىن شەكارادا ۆيزا الۋعا بولادى. ال ۇشاقتا ۇزاق ۋاقىت ۇشۋدان قورىقپايتىنداردىڭ ەستەرىنە پالاۋ، ميكرونەزيا، كۋكا ارالدارى، باربادوس، ەكۆادور مەملەكەتتەرىن ەستەرىنە سالا كەتۋدى ءجون كوردىك. بۇل ەلدەردە 28-31 كۇن ارالىعىندا ساياحاتتاۋىڭىزعا بولادى.

Stan.kz