افريكادا ەلدى ينتەرنەت جانە سۋمەن قامتاماسىز ەتەتىن 15 توننالىق كومپيۋتەر جاسالدى

استانا. قازاقپارات - ەۋروپالىق Watly ستارتابى ماۋسىم ايىنا قاراي افريكا تۇرعىندارىن سۋمەن، ەلەكتر قۋاتىمەن جانە ينتەرنەتپەن قامتاماسىز ەتۋگە باعىتتالعان 15 توننالىق كومپيۋتەردىڭ ءۇشىنشى نۇسقاسىن قۇراستىرۋدى جوسپارلاپ وتىر.

بۇل تۋرالى Quartz جازادى.

Watly كومپيۋتەرىنىڭ بيىكتىگى - شامامەن 2 مەتر، ۇزىندىعى - شامامەن 40 مەتر. ول كۇن باتارەيالارى ارقىلى جۇمىس ىستەيدى. ءارى بولشەكتەرى قىزعان كەزدە سۋدى جوعارى قىسىممەن بۋعا اينالدىرىپ تازارتا الادى. جىلدىق قۋاتى - 3 ميلليون ليتر. جوبا اۆتورلارىنىڭ ءبىرى ماركو اتتيسانيدىڭ ايتۋىنا قاراعاندا، ءار ماشينا 15 جىل ۇزدىكسىز جۇمىس جاساۋعا شاقتالعان.

Watly 500 مەتر راديۋستا Wi-Fi تاراتا الادى. سونىمەن قاتار ءار ماشينادا عالامتورعا تىكەلەي قول جەتكىزۋ ءۇشىن تاچسكريندەر ورناتىلعان.

اپپاراتتىڭ ءبىرىنشى نۇسقاسىن اتتيساني كومپانياسى ءۇش جىل بۇرىن جاسادى. 2015 -جىلدىڭ سوڭىندا Discovery تەلەارناسى گاناداعى اۋىلداردىڭ بىرىندە Watly-دى ورناتىپ، اتالعان قۇرىلعىنى جەرگىلىكتى تۇرعىنداردىڭ قالاي قولدانعانىن باقىلادى.