وڭتۇستىك قازاقستاندا وليمپيادا ويىندارىنا قاتىساتىن سپورتشىلاردىڭ سانى 15 كە جەتتى

استانا. قازاقپارات - وڭتۇستىك قازاقستان وبلىسىنىڭ قورجىنى تاعى ءبىر جولدامامەن تولىقتى. شىمكەنتتىك كوركەم گيمناستشى سابينا اشىربايەۆا تاياۋدا وتكەن برازيلياداعى ليتسەنزيالىق چەمپيوناتتا 69,5 بالل جيناپ، ءبىرىنشى ورىن الدى، دەپ حابارلادى و ق و اكىمىنىڭ باسپا ءسوز قىزمەتى.

جەرلەسىمىز اۆستريا، گەرمانيا، يتاليا مەن فينليانديانىڭ گيمناستشىلارىنان وزا شاۋىپ، ۇزدىك اتاندى. وسىلايشا، برازيليانىڭ ريو- دە- جانەيرو قالاسىندا وتەتىن جازعى ХХХІ وليمپيادا ويىندارىنا قاتىساتىن وبلىس سپورتشىلارىنىڭ سانى 15-كە جەتتى.

وليمپيادا جۇلدەسىنە ۇمىتكەر رەتىندە ەلىمىزدىڭ نامىسىن جالعىز ءوزى قورعايتىن كوركەم گيمناسشى ءۇشىن بۇل العاشقى وليمپيادا ويىنى بولىپ وتىر. ەندى سابينا ريودا وتەتىن ХХХІ وليمپيادا ويىندارىندا قايتا توپتى جارۋ ءۇشىن تىڭعىلىقتى دايىندىققا كوشەتىن بولادى.

ەستەرىڭىزگە سالايىق، ازيانىڭ ابسوليۋتتىك چەمپيونى ءاليا يۋسۋپوۆانىڭ باپكەرلىگىمەن جارىستارعا دايىندالىپ جۇرگەن سابينا بىلتىر ينچحوندا وتكەن ازيا ويىندارىندا قولا مەدالگە يە بولعان ەدى.