الماتىنى جايلى قالاعا اينالدىراتىن 15 جوبا
بۇل سوماعا قالانى اباتتاندىرۋ بويىنشا 15 جوبا جۇزەگە اسىرىلادى. جاڭا جوبالار 415 ادامدى جۇمىسپەن قامتىماق.
«مەملەكەت باسشىسىنىڭ الماتىعا ساپارى بارىسىندا بەرگەن تاپسىرمالارىن ورىنداۋ مەن «الماتى-2020» دامۋ باعدارلاماسىنىڭ 7 باسىم باعىتىن جۇزەگە اسىرۋ باعىتىندا جەرگىلىكتى بيۋدجەتتەن قوسىمشا 21 ميلليون تەڭگە قاراستىرىلىپ وتىر. اتاپ ايتقاندا، جايلى قالا جوباسىن جۇزەگە اسىرۋعا بيىل قۇنى 2,6 ميلليارد تەڭگە بولاتىن 15 جاڭا جوبا اتقارىلادى»، - دەدى قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ماقسات قيقىموۆ.
ونىڭ ايتۋىنشا، الاتاۋ اۋدانىندا 420 گەگتار اۋماقتى كوگالداندىرۋ ءۇشىن قۇنى 15 ميلليون تەڭگە بولاتىن 10 ۇڭعىما ورناتىلادى. قازىر جۇمىستىڭ جوبالىق-سمەتالىق قۇجاتتاماسى ازىرلەنىپ جاتىر.
سونداي-اق، مومىش ۇلى بويىنداعى 12,3 گەگتار جاسىل جەلەكتى سۋارۋعا قۇنى 313 ميلليون تەڭگە بولاتىن سۋعارۋ قۇبىرى توسەلەدى. 12 مىڭ ورىنعا ارنالعان مۇز ايدىنى ارەناسى مەن 7,1 گا بولاتىن اتلەتيكالىق قالاشىقتىڭ ماڭىن كوگالداندىرۋعا 112 ملن تەڭگە جۇمسالادى.
3 مىڭ ورىندىق مۇز ايدىنى ارەناسىنىڭ ماڭايىنداعى جاسىل بەلدەۋدى قالپىندا ساقتاپ تۇرۋ ءۇشىن 102 ميلليون تەڭگە جۇمسالادى.
مەدەۋ شاتقالى ايماعىنا كولىكتىڭ ەنۋىنە تىيىم سالىنۋىنا بايلانىستى قوزعالىستىڭ جاڭا كونتسەپتسياسى جاسالادى. تروتۋارلار مەن اۆتوتۇراقتاردى، شاعىن ساۋلەت فورمالارىن جاساۋعا 48 ملن تەڭگە جۇمسالادى.
مەدەۋ جانە المالى اۋداندارىندا 6 جاياۋ جۇرگىن ايماعى جاسالادى. تولەبايەۆ، جىبەك جولى، گوگول، ناۋرىزباي، پانفيلوۆ، قابانباي باتىر، استانا الاڭىندا بوي كوتەرەتىن بۇل الاڭداردا ادامداردىڭ دەمالۋىنا ارنالعان لاندشافتتى كوگالداندىرۋ جاسالادى. بالالار الاڭى پايدا بولادى. بۇعان قۇنى 170 ميلليون تەڭگە بولاتىن جوبالىق- سمەتالىق قۇجاتتاما جاسالىپ جاتىر.
بوستاندىق اۋدانىندا پرەزيدەنت ساياباعى قايتا قالپىنا كەلتىرىلەدى. بۇل باعىتتا 20 ميلليون تەڭگە جۇمسالادى.
دات ساۋلەتشىسى يان گەيلدىڭ كونسەپتسياسى بويىنشا ەسەنتاي وزەنىنىڭ بويىمەن تيميريازيەۆ كوشەسىنەن بۇقار جىراۋ كوشەسىنە دەيىن جاياۋ جۇرگىن جولىن جاساۋ ءۇشىن 10,2 ميلليون تەڭگە، بايسەيتوۆا كوشەسىنىڭ بويىمەن ساتپايەۆ كوشەسىنەن قابانباي باتىر كوشەسىنە دەيىن 7,2 ميلليون تەڭگە قاجەت.
جەتىسۋ اۋدانىندا ەسەنتاي وزەنىنىڭ بويىن قايتا قالپىنا كەلتىرۋ ءۇشىن جوباسىنىڭ العاشقى كەزەگىن جۇزەگە اسىرۋعا 780,4 ميلليون تەڭگە جۇمسالادى.
اتاپ ايتقاندا، وزەننىڭ 4,6 شاقىرىمدىق جاعالاۋى اباتتاندىرىلىپ، وزەن جاعاسى بەتون كونسترۋكتسيامەن قورشالادى. 19 جاياۋ جۇرگىن كوپىرى، 44 قوقىس جاشىگى، 22 ورىندىق قويىلادى.
اۆتور: گۇلميرا عوسمان-ءالي
