الماتى وبلىسىندا جاڭا وقۋ جىلىندا 15 جاڭا مەكتەپ اشىلدى
بۇل تۋرالى الماتى وبلىسىنىڭ اكىمى اماندىق باتالوۆ تالدىقورعان قالاسىنا قاراستى ەركىن سەلولىق وكرۋگىندە جاڭادان اشىلعان 100 ورىندى شاعىن ورتالىعى بار 300 ورىندىق مەكتەپتىڭ سالتاناتتى اشىلۋىندا حابارلادى، دەپ جازادى zhetysu.gov.kz.
ءوڭىر باسشىسى ا. باتالوۆ مەكتەپ تابالدىرىعىن اتتاعان وقۋشىلار، ولاردىڭ اتا- انالارى مەن ۇستازدار قاۋىمىن ءبىلىم كۇنىمەن قۇتتىقتادى.
- ەلباسى تاپسىرماسىن جۇزەگە اسىرۋ ماقساتىندا وبلىس اۋماعىندا جاڭادان 15 مەكتەپ پايدالانۋعا بەرىلدى. ونىڭ ىشىندە 5 مەكتەپ اپاتتى مەكتەپتەردىڭ ورنىنا سالىندى. ءسويتىپ، بۇگىنگى تاڭدا وبلىس بويىنشا رايىمبەك اۋىلىندا تەك ءبىر عانا اپاتتى مەكتەپ قالدى. وسى ورايدا، وبلىستا ءۇش اۋىسىمدى مەكتەپتەر مەن اپاتتى مەكتەپتەردى جويۋ بويىنشا ناقتى جۇمىستار اتقارىلۋدا. بۇگىن ءبىز 300 ورىندىق تاعى ءبىر مەكتەپتىڭ ەسىگىن اشىپ وتىرمىز، - دەدى ا. باتالوۆ.
ۇستىمىزدەگى جىلى وسى اتالعان مەكتەپپەن قاتار، ەڭبەكشىقازاق اۋدانىنداعى قايىپوۆ اۋىلىندا (300 ورىندى)، ىلە اۋدانىنداعى قۇيعان اۋىلىندا (180 ورىندى)، كومسومول اۋىلىندا (450 ورىندى)، تلەنديەۆ اۋىلىندا (600 ورىندى)، قاراساي اۋدانىنداعى كوكوزەك اۋىلىندا (180 ورىندى)، جارمۇحانبەت اۋىلىنداعى (120 ورىندى)، جامبىل اۋدانىنداعى ەڭبەكشى ارال اۋىلىنداعى (280 ورىندى)، كوكسۋ اۋدانىنداعى كەڭارال اۋىلىندا (120 ورىندى)، پانفيلوۆ اۋدانىنداعى كىشى پيدجيم اۋىلىنداعى (180 ورىندى)، تالعار اۋدانىنداعى بەساعاش اۋىلىندا (600 ورىندى)، المەرەك اۋىلىندا (300 ورىندى)، اقدالا اۋىلىندا (300 ورىندى)، قاپشاعاي قالاسىنداعى ارنا اۋىلىندا (120 ورىندى) مەكتەپتەر سالىنىپ، قاراساي اۋدانىنىڭ جاندوسوۆ اۋىلىنداعى 300 ورىنعا ارنالعان مەكتەپ عيماراتىنا جاناما سالىنعان نىساننىڭ قۇرىلىسى اياقتالىپ، وندا العاشقى قوڭىراۋدىڭ ءۇنى سىڭعىرلادى.