قىتاي تۇرمەلەرىندە 15 قازاقستاندىق ازامات وتىر - ق ر- دىڭ ق ح ر- داعى ەلشىسى ش. نۇرىشيەۆ
بۇل تۋرالى قازاقستاندىق تىلشىلەر ءۇشىن وتكىزىلگەن باسپا ءسوز ءماسليحاتى بارىسىندا ق ر- دىڭ ق ح ر- داعى توتەنشە جانە وكىلەتتى ەلشىسى شاحرات نۇرىشيەۆ حابارلادى.
«قازىرگى كەزدە قىتاي اۋماعىنداعى تۇرمەلەردە 15 ادام (ق ر ازاماتتارى - رەد. ) وتىرعانىن اتاپ ءوتۋ كەرەك. بۇل ەلگە ەلباسى ساپارىنا دەيىن 20 ادام بولعان. ءبىراق ساپار الدىندا قىتايلىق تاراپپەن ءبىزدىڭ ءتيىستى قۇزىرەتتى ورگاندارىمىزعا ۇزاق ۋاقىت بويى قىتاي اۋماعىندا بولعان بەس سوتتالۋشىنى تاپسىرۋ تۋرالى كەلىسىمدى ىسكە اسىردىق. ولار قازاقستانعا تاپسىرىلىپ، ەندى جازالارىن قازاقستاننىڭ تۇزەۋ اباقتىلارىندا وتەيدى»، - دەدى ول.
ەسكە سالا كەتەيىك، ق ر ازاماتتارىن تاپسىرۋ 2015 - جىلدىڭ 28 - تامىزىندا ق ح ر شىنجاڭ- ۇيعىر اۆتونومدىق ولكەسىنىڭ ءۇرىمجى قالاسىندا ءوتتى. ەكستراديتسيالانعان قازاقستاندىقتار قىتاي حالىق رەسپۋبليكاسى قىلمىستىق زاڭناماسىنىڭ نورمالارىن بۇزعانى ءۇشىن ءتۇرلى مەرزىمدەرگە سوتتالعان، سونىڭ ىشىندە ءولىم جازاسى مەن ءومىرىنىڭ سوڭىنا دەيىن باس بوستاندىعىنان ايىرۋ جازالارى بار.
قازاقستاندىق سوتتالۋشىلاردى تاپسىرۋ ق ر سىرتقى ىستەر مينيسترلىگى، ق ر باس پروكۋراتۋراسى جانە ق ر- دىڭ ق ح ر- داعى ەلشىلىگىنىڭ قىتايلىق ارىپتەستەرىمەن ۇزاق ۋاقىت بويى بىرلەسىپ كوپ ەڭبەكتەنۋىنىڭ ناتيجەسىندە مۇمكىن بولدى.
ق ر مەن ق ح ر اراسىندا 2011 - جىلدىڭ 22 - اقپانىندا سوتتالعان تۇلعالاردى تاپسىرۋ تۋرالى كەلىسىمىنىڭ كۇشىنە ەنۋى قىتايلىق تاراپتىڭ «ىزگى تىلەك يشاراتى» بولعانىن اتاپ ءوتۋ كەرەك.
اتالعان كەلىسىمنىڭ كۇشىنە ەنۋى تۋرالى بەكىتۋ گراموتالارىمەن الماسۋ ق ر پرەزيدەنتى نۇرسۇلتان نازاربايەۆتىڭ 2015 - جىلعى 31 - تامىز بەن 3 - قىركۇيەك ارالىعىندا جاساعان مەملەكەتتىك ساپارىنىڭ بارىسىندا ءوتتى.