قازاقستاننىڭ اەروۇتقىر اسكەرلەرى 15 جىلدىعىن اتاپ ءوتتى - فوتو
وسىعان وراي ارنايى ۇيىمداستىرىلعان مەرەكەلىك شارادا قارۋ-جاراق پەن اسكەري تەحنيكانىڭ كورمەسى، اسكەري وركەسترلەردىڭ دەفيلەسى، قويان-قولتىق ۇرىس ەلەمەنتتەرى بار كورسەتىلىمدەر، پاراشيۋتتەن سەكىرۋ، ازىرلەنگەن كونتسەرتتىك باعدارلاما كورسەتىلدى.
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.
53975 اسكەري بولىمىندە ۇيىمداستىرىلعان مەرەكەلىك ءىس-شاراعا ق ر قورعانىس مينيسترلىگى مەن ق ر ق ك قۇرلىق اسكەرلەرىنىڭ وكىلدەرى، ەلىمىزدىڭ قارۋلى كۇشتەر ارداگەرلەرى كەلدى.
«قازىرگى اەروۇتقىر اسكەرلەرىنىڭ بەسىگى 35-گۆارديالىق دەسانتتىق-شابۋىلداۋ بريگاداسى بولىپ تابىلادى. بۇگىندە ءوزىنىڭ جاۋىنگەرلىك ازىرلىگىن ءارقاشان سەنىمدى تۇردە دالەلدەيتىن بۇل اسكەر ءتۇرىن ماقتان ەتە الامىز. بارلىق اسكەري قىزمەتشىلەرگە، سونداي-اق اەروۇتقىر اسكەرلەرىنىڭ دامۋىنا زور ۇلەس قوسقان ارداگەرلەرگە العىسىمىدى بىلدىرگىم كەلەدى»، - دەدى سالتاناتتى راسىمدە ق ر ق ك ءاەۇا قولباسشىسى گەنەرال-مايور داۋلەت وسپانوۆ.
قازاقستاننىڭ اەروۇتقىر اسكەرلەرى ارميامىزدىڭ جاۋىنگەرلىك قابىلەتتى جانە ۇتقىر اسكەر تەكتەرىنىڭ ءبىرى. ولار داعدارىستىق احۋالداردا جاۋىنگەرلىك قولدانۋ ءۇشىن ارنالعان جانە قىسقا مەرزىمدە اۋقىمى بويىنشا ءارتۇرلى اسكەري شيەلەنىستەردە جاۋىنگەرلىك تاپسىرمالاردى شەشۋگە قابىلەتتى.
ولاردىڭ قۇرىلۋ تاريحى «قازاقستان رەسپۋبليكاسى قارۋلى كۇشتەرىنىڭ قۇرىلىمى تۋرالى» 2000-جىلعى 6- شىلدەدە پرەزيدەنتتىڭ جارلىعىنان باستالدى. وندا 35-گۆارديالىق دەسانتتىق-شابۋىلداۋ بريگاداسىنىڭ بازاسىندا ق ر ق ك ۇتقىر كۇشتەرى قۇرىلعان بولاتىن. وزدەرىنىڭ قازىرگى اتاۋىن اەروۇتقىر اسكەرلەرى 2013-جىلدىڭ قىركۇيەگىندە الدى (قورعانىس ءمينيسترىنىڭ ديرەكتيۆاسى نەگىزىندە ۇتقىر كۇشتەرى اەروۇتقىر كۇشتەرى بولىپ اتى وزگەرتىلدى).
بۇگىنگى كۇنى اەروۇتقىر اسكەرلەرى قازاقستان قارۋلى كۇشتەرى قۇرلىق اسكەرلەرىنىڭ قۇرامىنا كىرەدى.
