09:46, 05 - تامىز 2014 | GMT +5
مەيرامحانادا تاماقتانار الدىندا دۇعا ەتكەندەرگە %15 جەڭىلدىك جاسالعان
استانا. قازاقپارات - امەريكانىڭ سولتۇستىك كارولينا شتاتىنىڭ Mary's Gourmet Diner مەيرامحاناسىنىڭ يەلەرى الدىنا قويىلعان استى ىشەر الدىندا دۇعا ەتكەندەرگە 15 پايىز جەڭىلدىك جاساعان، دەپ حابارلايدى HLN.
تاماق تانۋ مەكەمەسىنىڭ يەسى مەري حاگلۋند مۇنداي جەڭىلدىكتەردىڭ ۇنەمى جاسالا بەرمەيتىنىن جەتكىزدى.
شىلدە ايىنىڭ اياعىندا رەستوران قوناقتارىنىڭ ءبىرى ءوزىنىڭ Facebook-تەگى پاراقشاسىندا جەڭىلدىك جاسالعان چەكتىڭ سۋرەتىن جاريالاعان بولاتىن. نەبارى بىرنەشە كۇن ىشىندە بۇل سۋرەتكە لايك باسقاندار سانى 10 مىڭعا جۋىقتاعان. سونداي-اق اتالمىش مەيرامحانانىڭ الەۋمەتتىك جەلىدەگى پاراقشاسىنا جازىلۋشىلار سانى دا ەكى ەسەگە جۋىق وسكەن.
مەري حاگلۋندتىڭ ايتۋىنشا، ولار مۇنداي شارانى ءتورت جىلدان بەرى قولعا الىپ كەلەدى.
«مەن مۇنى مىندەتتى تالاپ رەتىندە ەنگىزگەن ەمەسپىن، الايدا ۇستەل باسىندا اس ىشەر الدىندا دۇعا ەتىپ وتىرعان ادامدى كورسەم، مىندەتتى تۇردە وعان العان تاماعى ءۇشىن تولەمدەرىندە جەڭىلدىك جاساپ، وسىلايشا العىسىمدى بىلدىرەمىن»، - دەيدى ول.
