ورازا ۇستاۋشىعا 15 كەڭەس

1. نامازعا ۇقىپتى بولۋ. ناماز - ءدىنىمىزدىڭ تىرەكتەرىنىڭ ءبىرى، ونى تارك ەتۋ كۇپىرلىك سانالادى. كەيبىر ورازا تۇتۋشىلار بولسا، نامازعا نەمقۇرايدى قارايدى.
2. كوركەم مىنەز- قۇلىقتى ۇستانۋ. كۇپىرلىكتەن، دىنگە ءتىل تيگىزۋدەن جانە ورازا ەكەنىمىزدى مىندەت قىلىپ ادامدارمەن جامان قارىم-قاتىناس جاساۋدان ساقتانۋىمىز كەرەك. ورازا مىنەز-قۇلىقتى بۇزباي، كەرىسىنشە ونى تۇزەيدى، ال كۇپىرلىك ادامدى دىننەن شىعارادى. اللا ەلشىسى س. ا. س. «كىمدە-كىم وتىرىك ءسوز بەن وعان امال قىلۋدان تىيىلماسا، اللاعا ونىڭ جەپ-ىشۋدەن تىيىلۋىنىڭ قاجەتى جوق»، - دەپ ايتقان.
3. قالجىڭداپ بولسا دا جامان سوزدەر ايتپاۋ. ايتپەسە تۇتقان ورازامىز زايا كەتەدى. اللا ەلشىسىنىڭ س. ا. س: «قايسى ءبىرىڭنىڭ ورازا تۇتاتىن كۇنى بولسا، وندا بۇزىقتىق ىستەمەسىن، ايعاي-شۋ شىعارماسىن، ال ەگەر بىرەۋ ونى بالاعاتتاسا نەمەسە وعان سوقتىقسا: «مەن ورازا تۇتقان اداممىن» دەسىن»، - دەپ ايتقانىن ءاردايىم ەستە ۇستاۋ قاجەت.
4. قىلتاماق، اسقازان جاراسى سياقتى كوپتەگەن كەسەلدەرگە سەبەپشى بولاتىن تەمەكىنى تاستاۋعا ورازا كەزدى پايدالانىپ قالۋ كەرەك. ەرىك-جىگەردى جيناقتاپ، ۇستامدىلىق تانىتىپ، تەمەكىنى كۇندىز شەكپەگەندەي تۇندە دە شەكپەۋ قاجەت. سوندا دەنساۋلىعىمىزدى ساقتايمىز جانە اقشامىزدى دا ىسىراپ قىلمايمىز.
5. اۋىز اشاردا تاماقتى شەكتەن اسىرا قارپىماۋ. بۇل ورازانىڭ پايداسىن كەمىتەدى، ءارى دەنساۋلىققا زيان تيگىزەدى.
6. ادامنىڭ مىنەز- قۇلقىن بۇزىپ، ورازاعا كەرەعار كەلەتىن تەلەباعدارلامالار مەن فيلمدەردى قاراماۋ.
7. ۇيىقتاپ قالىپ، سارەسى مەن تاڭ نامازىن جىبەرىپ الماس ءۇشىن تۇندە ۇزاق وتىرماعان ءجون. ءىس- امالداردى ەرتە تاڭدا ورىنداعان جاقسى. اللا ەلشىسى (س. ا. س.): «اللاھىم! ۇمبەتىم ءۇشىن ەرتە تاڭدارىن بەرەكەلى ەتكەيسىڭ!» - دەگەن.
8. پايعامبار (س. ا. س.) قۇپتان نامازىنان كەيىن اڭگىمە-دۇكەن قۇرىپ وتىرۋدى ۇناتپايتىن. ول كىسى (س. ا. س.) ەرتە جاتىپ، ەرتە تۇراتىن.
9. تۋعان-تۋىستار مەن مۇقتاجدارعا ساداقا بەرۋدى كوبەيتۋ، اعايىنداردان حابار الۋ جانە ارازداسقاندارمەن تاتۋلاسۋ.
10. اللانى ءجيى ەسكە الۋ، قۇران وقۋ، ونى تىڭداۋ، ماعىناسىنا وي جۇگىرتۋ، وعان امال قىلۋ، پايدالى دارىستەر تىڭداۋ ءۇشىن مەشىتكە بارۋ جانە اللا ەلشىسىنىڭ (س. ا. س.) سۇننەتى بويىنشا رامازاننىڭ سوڭعى كۇندەرىندە مەشىتتە يعتيكافقا وتىرۋ.
11. پايعامبارىمىزدىڭ (س. ا. س.) سۇننەتىنە ساي اۋىز اشۋ. اللا ەلشىسى (س. ا. س.) «قايسى بىرىڭ اۋىز اشاتىن بولسا، كەپكەن قۇرمامەن اۋىز اشسىن، ويتكەنى وندا بەرەكە بار. ەگەر كەپكەن قۇرما تاپپاسا، سۋمەن (اشسىن) ، ويتكەنى ول- تازا» . «ادامدار اۋىز اشاردى اسىقتىرعان سايىن يگىلىكتە بولادى»، - دەگەن. اللا ەلشىسى (س. ا. س.) اۋىز اشاردا: «اللاھۋمما لاكا سۋمتۋ ءۋا ءالا ريزقيكا ءافتارتۋ، ءزاھاباز - ءزاما-ۋ ءۋابتاللاتيل- ۋرۋقۋ، ءۋا ءساباتال- اجرۋ ينشا اللاھ[5]» - دەپ ايتقان.
12. سارەسىنى ءىشۋ. اللا ەلشىسى (س. ا. س.): «سارەسى ىشىڭدەر، ويتكەنى سارەسىدە بەرەكە بار»، - دەگەن.
13. ورازانىڭ ۇكىمدەرىن ءبىلۋ ءۇشىن ول جايلى جازىلعان كىتاپتاردى وقۋ. ول كىتاپتاردان ۇمىتىپ تاماق جەپ، سۋ ءىشىپ قويۋ ورازانى بۇزبايتىنى، تۇندە ءجۇنىپ بولۋ ورازا تۇتۋعا كەدەرگى جاسامايتىنى جانە ت. س. س. نارسەلەر باياندالعان.
14. رامازانداعى ورازاعا ۇقىپتى قاراۋ جانە بالالارعا شامالارى جەتكەنشە ورازا ءتۇتۋدى ۇيرەتۋ. رامازان ايى كۇندەرىندە سەبەپسىز اۋىز اشىپ، ورازانى بۇزۋدان ساقتانۋ. ويتكەنى ادەيى ءبىر كۇن اۋىز اشقان كىسى جانە رامازان ايىندا كۇندىزگى ۋاقىتتا ايەلىمەن جاقىنداسقان ادام شاريعات بەلگىلەگەن ءتارتىپ بويىنشا كاففارات امالدارىن وتەيدى .
15. رامازان ايىندا ورازانى تۇتپاي جۇرۋدەن ساقتانۋ لازىم. تۇتپاعان كۇننىڭ وزىندە ونى ادامدارعا جاريالاماۋ قاجەت. ويتكەنى ورازا ۇستاماۋ اللاعا قارسى كەلۋ، يسلامعا ات ءۇستى قاراۋ جانە ادامدار اراسىندا ۇياتسىز قىلىق بولىپ تابىلادى. ورازا تۇتپاعان ادامعا ايت مەرەكەسى دە جوق. ويتكەنى ايت ورازانىڭ اياقتالۋى مەن قۇلشىلىقتاردىڭ قابىل بولۋىنا بايلانىستى ۇلى قۋانىشتى بىلدىرەدى، ال ورازا تۇتپاعان ادام بۇل قۋانىشتان ماقرۇم قالادى.
oraza.info