بريتاندىق سپورتشى 157 كۇن سۋدا ءجۇزىپ، رەكورد جاسادى

استانا. قازاقپارات - بريتاندىق سپورتشى روسس ەدجلي  ۇلى بريتانيا ارالدارىن اينالا جۇزگەن تاريحتاعى العاشقى ادام اتاندى، دەپ حابارلايدى Sky News تەلەارناسى.

رەكورد جەكسەنبى كۇنى جاسالعان.

33 جاستاعى سپورتشى مارگيت قالاسىنان 1- ماۋسىم كۇنى شىقتى.

ول جانىنداعى كاتاماراندا دەمالاتىن جانە تۇنەيتىن بولعان.

ەدجلي كۇن سايىن سۋدا 12 ساعاتتان جۇزگەن جانە بىردە ءبىر رەت جاعاعا شىقپاعان كورىنەدى.

157 كۇننىڭ ىشىندە جۇزگىش 3317 شاقىرىمدى ارتقا تاستاپ، ساپارىن ءوزى العاش باستاعان مارگيتتەگى جاعاجايىندا ءساتتى اياقتادى.

ەدجليدىڭ سوزىنە قاراعاندا، ءجۇزۋ كەزىندە ءتۇرلى وقيعالاردى باستان كەشۋىنە تۋرا كەلگەن. ءبىر قىزىعى، كۇش-قۋاتىن قالپىنا كەلتىرۋ ءۇشىن 640 بانان جەگەن.

ءجۇزۋدى ءساتتى اياقتاعان سپورتشى وسىمەن ءۇشىنشى رەت گيننەستىڭ رەكوردتار كىتابىنا ەنىپ وتىر.