پرەزيدەنتتىك كادر رەزەرۆىنە الماتى وبلىسىنان 156 ادام ءوتىنىش بىلدىرگەن
ولاردىڭ تەك التاۋى عانا سىناقتىڭ العاشقى كەزەڭىنەن سۇرىنبەي وتكەن، دەپ حابارلايدى قازاقپارات ءتىلشىسى.
كادرلىق رەزەرۆكە ءوتىنىش بىلدىرگەن التى ازاماتتىڭ تورتەۋى مەملەكەتتىك قىزمەتكەر. ءبىر ازامات كاسىپكەر بولسا، تاعى ءبىر ازامات ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ وقىتۋشىسى. الماتى وبلىسى اكىمدىگىندە باس ينسپەكتور بولىپ قىزمەت ەتەتىن باقتيار كوشكىنوۆ پرەزيدەنتتىك كادرلىق رەزەرۆكە كىرۋگە نيەت بىلدىرگەن جانداردىڭ ءبىرى.
«بولاشاق» باعدارلاماسىنىڭ تۇلەگى بۇل جوباعا قويىلعان تالاپتار وتە قاتاڭ جانە سىناقتارى دا وتە قيىن ەكەنىن ايتادى. العاشقى ءۇش ەمتيحاننان سۇرىنبەي وتكەن مەملەكەتتىك قىزمەتشى ەندىگى سىناقتارعا قىزۋ دايىندالىپ جاتىر.
باس ينسپەكتور: «مەملەكەتتىك قىزمەتتە جۇرگەن ءار قىزمەتكەر ءوزىن نۇر-سۇلتان قالاسىندا، ۇكىمەت ۇيىندە، اقوردادا جۇمىس ىستەپ جاتقانىن ەلەستەتۋ كەرەك. ەگەردە ول ولاي ەلەستەتپەيتىن بولسا، ول مەملەكەتتىك قىزمەتتە وسپەيتىن دە شىعار» دەگەن پىكىردە.
«ال وسى ماقساتتاردىڭ ورىندالۋىنا مەملەكەت بارلىق مۇمكىندىك بەرىپ وتىر. وقيمىن دەسەڭ شەت ەلگە بارىپ «بولاشاق» باعدارلاماسىمەن وقىپ كەل. ال مەملەكەتتىك قىزمەت باسپالداعىمەن جوعارىلاعىڭ كەلسە قاسىم-جومارت توقايەۆتىڭ پرەزيدەنتتىك جاستار كادرلىق رەزەرۆىندە ءوزىڭدى سىناپ كورۋگە مۇمكىندىك بار»، - دەيدى جاس مامان.
