02:10, 18 - شىلدە 2015 | GMT +5
استانادا ءساۋىر ايىنان بەرى ەسىل وزەنىنەن 156 توننا قوقىس شىعارىلعان
استانا. قازاقپارات - جىل سايىن كوكتەم مەزگىلىنىڭ كەلۋىمەن ەلوردادا ەسىل وزەنىنىڭ ارناسىن تازارتۋ جۇمىستارى قارقىندى جۇرگىزىلەدى.
استانا قالاسى "ەسىل" اۋدانى اكىمدىگىنىڭ حابارلاۋىنشا، "قازبيوسەرۆيس" ج ش س تۇراقتى تۇردە اۋدان اۋماعىنداعى تازارتۋ جۇمىستارىن جۇزەگە اسىرادى، دەپ حابارلايدى ەلوردا اكىمدىگىنىڭ باسپا ءسوز قىزمەتى.
كۇندەلىكتى كومپانيا جۇمىسشىلارى جاعالاۋ مەن سۋ بەتىن، قامىس اراسىن، بالدىرلاردى تازارتۋمەن اينالىسادى.
بۇگىنگى تاڭدا مەردىگەر مەكەمە اتالمىش جۇمىسقا 3 قايىق، 2 دانا جۇك تيەگىش كولىك پەن 25 جۇمىسشىنى تارتتى.
"ەسىل" اۋدانى اكىمدىگى اباتتاندىرۋ ءبولىمىنىڭ مالىمەتىنە سۇيەنسەك، اعىمداعى جىلدىڭ ءساۋىر ايىنان بەرى ەسىل وزەنىنىڭ ارناسىن تازارتۋ كەزىندە 156 توننا قوقىس شىعارىلعان بولاتىن.
